Espersen: Namminiilivinneq amerikamiunit aningaasalersorneqarnissaa piviusorsiortuunngilaq

Dansk Folkepartiimeersup Søren Espersenip paasisinnaanngilaa sooq Kalaallit Nunaat kimmut qiviartariaqassasoq uuliasiornermut gasimillu ujarlernissamut aningaasaliisussarsiorluni.

Uuliasioqatigiiffiit Trumpiunngitsoq uuliamik ujarlerput. Uuliasioqatigiiffiit ataasiakkaarlutik Kalaallit Nunaanniit assigiinngitsunik peqquteqarlutik tunuartitersimapput, annertulli issittumi pissutsit peqqutigalugit. Ukiumummi taamaallaat qaammatini marlunni uuliamik qalluisoqarsinnaavoq.

Canadami tusagassiorfik Nunatsiaq Online naapertorlugu nunanut allanut tunngasunut naalakkersuisoq Vittus Qujaukitsoq Arctic Circle Forumimi Canadami sapaatip akunnerani matumani Trumpip naalakkersuisunngortitsinissaa neriulluarfigalugu oqaaseqarfigaa.

Taakkumi Kalaallit Nunaata namminersulerusunnera tapersersorsinnaavaat, Kalaallit Nunaanni uuliamik gasimillu ujarlernermut aningaasaliinermikkut, Qujaukitsoq oqarpoq.

AAMMA ATUARUK Nunatta aningaasatigut imminut napatilernissaanut Trumpip ikiorsinnaavaatigut

Søren Espersenili naapertorlugu Vittus Qujaukitsoq ukiunik 20-nik kingusinaarpoq:

- Paatsoorsimavoq. Uuliammi akii taakkuupput. Ukiulli 20-it matuma siorna uuliap akii aallaavigissagaanni imaassinnaavoq soorlu Kalaallit Nunaata Kangiata avannaani uuliasiortoqarsimasinnaasoq. Ullumikkulli akit eqqarsaatigalugit taamaattoqarsinnaanngilaq, Espersen oqarpoq.

Aammattaaq De Radikalit nunanut allanut tunngasunut ministererisimasaata Martin Lidegaardip Qujaukitsup oqaasii tupigusuutigai:

- Kalaallit Nunaannut aningaasaliisoqarnissaanik kissaat neriulluarpasippoq. Uanga nammineq naliliissaguma Kalaallit Nunaanni uuliamik ujarlertussarsiornermut taarsiullugu Naalagaaffeqatigiit tamarmiullutik nunami aatsitassarsiornermut, takornariartitsinermut aalisarnermullu aningaasaliisussarsiortariaqarput, Martin Lidegaard oqarpoq.

AAMMA ATUARUK Oruluallaarneq namminiilivinnissamut aqqutissaanngilaq

AAMMA ATUARUK Namminersulernissamut sipaarniarujussuartoqassaaq