Uranimut politikki suleqatigiissitap misissoqqilerpaa
Aatsitassarsioqatigiiffik Greenland Minerals And Energy pissangalluni utaqqivoq uranimut naaggaarluinnarsimanerup allanngortissinnaanerata misissuiffigineqalerneranut.
Inatsisartuni inuussutissarsiornermut ataatsimiititaliap aalajangerpaa suleqatigiissitap arlaannaannulluunniit attuumassuteqanngitsup uranimut naaggaarluinnarnerup allanngortinnerata kingunerisinnaasai misissussagai. Apeqqut tamanna qitiulluinnarpoq Greenland Minerals And Energyp aatsitassanik qaqutigoortunik Narsap eqqaani Kuannersuarni qalluinissamik suliniutaanut. Tassami qaqqami tassani oqallisaaqisumik aatsitassat uranimik akoqarput, tassalu taama akoqarnerat pissutaalluni qalluinissamut akuersisoqarsinnaanngikkallarpoq.
Maannali tassa inuussutissarsiornermut ataatsimiititaliap Naalakkersuisut pisussaaffilerpai immikkut ilisimasalinnik suleqatigiissitaliussasut taakkulu Inatsisartut upernaamut katersornissaannut nalunaarusiamik saqqummiissasut uranimut naaggaarluinnarnerup allanngortinnerata kingunerisinnaasaanik.
Naaggaarluinnarnerup allanngortinnissaa Siumup kissaatigaa. Suleqatigiissitap inassutissaa Demokraatit utaqqimaarpaat.
- Ilisimatuut oqassappata, uranimik piiaaneq avatangiisitigut peqqinnissakkullu illersorneqarsinnaavoq, taava isumaqarpugut, uranimik piaasoqartariaqartoq, inuussutissarsiornermut ataatsimiititaliami siulittaasup tullia Anda Uldum Demokraatineersoq oqarpoq.
Uranimut naaggaarluinnarsimaneq allanngortinneqassappat Narsap eqqaani aatsitassarsiornermut alloriaataasinnaavoq.
- Aatsitassanit allanit isertitat Kuannersuarni aatsitassarsiornissamut aningaasartuutit unamminarsisittussaavaat tassani aatsitassat qaqutigoortut qallornissaat iluaquserneqassammat. Uranimut naaggarluinnarnerup allanngortissinnaanerata aatsitassanik qaqutigoortunik nunarsuarmi niuernerneq sunnersinnaavaa tassani Kalaallit Nunaat qitiulluinnartunut ilanngussinnaammat, Greenland Minerals And Energy nalunaarpoq inuussutissarsiornermut ataatsimiitaliap aalajangernerata kingorna.