Upalungaarsimasut: Anorersuaq ajornartoornermi nukissiuummut sunniuteqarnavianngilaq
Silassamik aarlerisaarut naapertorlugu Nuummi ullaap tungaani anorlilertussaavoq.
Sekundimut 37,4 meterinik sukkassuseqartoq tikillugu anoraasuartussaavoq.
Nukissiorfiulli ajornartoornermi nukissiutaa dieselimik ingerlammat innaallagissap qamittoornissaanut aarlerinarnerusoqanngilaq.
Ajornartoornermi nukissiut anorimit silallu qanoq inneranit sunnerneqarsinnaanngitsoq, politiit nalunaarummi allapput.
Qamittoortoqassagaluarpalli, Kalaallit Nunaanni Politiit oqarasuaammut SMS-imik nassitsiumaarput.
Innaallagiamik sipaarnissaq suli pisariaqartoq, politiit ilanngullugu allappaat:
- Innaallagiaq sipaaruk sapinngisamillu kissarsuut, errorsivik, panersaavik aammalu allat innaallagiatortut pisariaqanngittumik ikumatinnissai. Arlaatigut pisariaqartilersinnaavat atisavit errortariaqarnissai, ilupaqutilli kingulliit atulissagukkit errorsinerit naammasseqqaaruk iggasilinnginninni - tamanna iluaqutaassaaq.
AAMMA ATUARUK Sanaartugassanik suliaqartartut generatorinik atugassiinerannut politiit qujassuteqartut
Qamittoortoqassagaluarpat Kommuneqarfik Sermersooq Timersortarfissuarmi isersimaarfiusinnaasumik pilersitsivoq. Tassani unnuinissaq, nerinissaq uffarnissarlu periarfissaassapput.
Tusassip nuna tamakkerlugu attaveqaatit aalaakkaalersimasut nalunaarutigaa, taamaakkaluartorli Nuummi ataasiakkaani attaveruttoortoqartarsinnaanerpaa.
Upalungaarsimasut tassa Kalaallit Nunaanni Politiit, Nukissiorfiit, Tusass aamma Kommuneqarfik Sermersooq politiit Facebookimi quppernerat aqqutigalugu ingerlaavartumik nalunaaruteqartassapput.
Aaqqiissuteqartoqarnissaanut ullut sapaatilluunniit akunneri ingerlasinnaasut
Qamittoornermut pissutaasoq nassaarneqartoq Nukissiorfiit pisortaata, Kaspar Mondrupip sisamanngornermi ualikkut tusagassiortunik katersortitsinermi nassuiaatigaa.
Ajoqutaasoq erngup nukinganik nukissiorfiup eqqaani kordelip kittorarneraa. Kabelit ataatsimoortuupput, tassanili kittorartoqarsimavoq, taamaalilluni immunnut attuunnerat pissutigalugu Nuummi qamittoortitsilluni.
AAMMA ATUARUK Nukissiorfiit: Ajoqut nassaaraarput, iluarsinissaali aqaguusinnaavoq sapaatit akunneriluunniit
Nukissiorfiup pisortaata ajoqutaasoq ullualuit iluanni iluarsaanneqarsinnaasoq imaluunniit sapaatini akunnerni arlalinni iluarsaanneqarsinnaasoq oqaatigaa.
Nukissiorfiit kabelinik tallimanngornermi misissuiartoqqipput, ajoquserneranulli tunngasumik KNR-imut suli paasissutissiissutigineqanngilaq.
Matumani kabelit ajoqusernerat takuneqarsinnaavoq:
