Sanaartugassanik suliaqartartut generatorinik atugassiinerannut politiit qujassuteqartut
Nuummi sarfamik pilersuineq tallimanngornermi aalaakkaappasippoq.
Illoqarfiit pingaarnersaanni ataasinngormalli qamittoortoqaqqaarpoq. Ataasinngornermit marlunngornermut qamittooqqaneq akunnernik 18-inik sivisussuseqarpoq.
Pisiniarfiit, politeeqarfik, peqqinnissaqarfillu sivisuunermik qamittooqqanerup nalaani ilungersorput, taakkulu ajornartoornermi generatorit atorlugit ilaannakortumik ikumallutik.
Oqartussalli sanaartugassanik suliaqartartunit arlalinnik ikiorneqarlutik innaallagiamik atuiinnarsinnaalerlutik, politiillu taakkununnga qujassuteqarniarput.
AAMMA ATUARUK Oqarasuaatit ajutooqqasut: Nunap immikkoortuani nakorsaaneq assingusumik nalaataqarnikuunngitsoq
Sanaartugassanimmi suliaqartartut generatorinik atugassaqartitsipput, taamaalillutik inuiaqatigiinnut pingaaruteqartut soorlu peqqinnissaqarfik qamittoortoqaqqissagaluarpat innaallagiaqaannarsinnaalluni.
Sanaartugassanik suliaqartartut MT Højgaard, Nuuk Oil, Permagreen, ISTAK, Munck Gruppen, EMJ-Atcon aamma Sarfaq atortitsisuupput.
- Politiit upalungaarsimanermi ataqatigiissaarisuupput, suliaqartullu tamarmik akornanni suleqatigiilluartoqartoq takusinnaavarput, aamma sanaartugassanik suliaqartartut generatoriminnik atortitsinerannut immikkut ittumik qujassuteqarfigerusuppagut, taamaalilluta inuiaqatigiinnut pingaaruteqartut suliaqaannarsinnaatippagut, Bjørn Tegner Bay qamittooqattaarnerit pillugit tusagassiortunik sisamanngornermi katersortitsinermi oqarpoq.
- Innuttaasunit tapersersorneqarluarpugut, taakkulu naapikkaangatsigit paasinnilluarsinnaanerminnik takutitsisarput.
Aaqqiissuteqartoqarnissaanut ullut sapaatilluunniit akunneri ingerlasinnaasut
Qamittoornermut pissutaasoq nassaarneqartoq Nukissiorfiit pisortaata, Kaspar Mondrupip sisamanngornermi ualikkut tusagassiortunik katersortitsinermi nassuiaatigaa.
Ajoqutaasoq erngup nukinganik nukissiorfiup eqqaani kordelip kittorarneraa. Kabelit ataatsimoortuupput, tassanili kittorartoqarsimavoq, taamaalilluni immunnut attuunnerat pissutigalugu Nuummi qamittoortitsilluni.
AAMMA ATUARUK Nukissiorfiit: Ajoqut nassaaraarput, iluarsinissaali aqaguusinnaavoq sapaatit akunneriluunniit
Nukissiorfiup pisortaata ajoqutaasoq ullualuit iluanni iluarsaanneqarsinnaasoq imaluunniit sapaatini akunnerni arlalinni iluarsaanneqarsinnaasoq oqaatigaa.
Nukissiorfiit aaqqiinissap tungaanut illoqarfiup ajornartoornermi nukissiorfianit dieselitortumik Nuummut sarfalersuigallassapput.
Nuummi innuttaasut sarfamik sipaarnissaannik kaammattuuteqarfigaat, tassa errorsinerit, kissarsuut atorlugu iganerit kissaatillu inini atunngitsuniittut ikumatinnissaat pinaveersaaqquaat.
Inuit taamaaliuinnassapput, politiit Nukissiorfiit sinnerlugit oqarput.
- Nukissiorfiit nalunaarutigaat tamanna sarfamik atuinermut malunniutaasoq, aammalu maannakkuugallartoq sarfalersuineq aalaakkaasumik ingerlasoq.
- Innuttaasut innaallagissamik atuinertik suli eqqumaffigisariaqarpaat sarfamillu pisariaqanngitsumik atuinaveersaarallassapput – sualummik errorsinissamik iffiorfikkullu nerisassiornissamut kinguartitseqqullugit.
Aammattaaq Tusassip nuna tamakkerlugu attaveqaatit aalaakkaalersimasut nalunaarutigaa, taamaakkaluartorli Nuummi ataasiakkaani attaveruttoortoqartarsinnaanerpaa.
