Nunap immikkoortuani nakorsaaneq, Jesper Olesen.Assi: KNR

Oqarasuaatit ajutooqqasut: Nunap immikkoortuani nakorsaaneq assingusumik nalaataqarnikuunngitsoq

Innaallagiap qamittooqqangaatsiarnera nunatsinni oqarasuaatit angallattakkat attaveqaataat marlunngornermi ullaap tungaani eqqugaapput. Tamanna pissutigalugu peqqinnissaqarfimmut politiinulluunniit sianertoqarsinnaanngilaq.

Nuummi innaallagiaaruteqqanera nunatsinni tamarmi oqarasuaatit angallattakkat marlunngornermi ullaap tungaani attaveerunnerannik kinguneqarpoq.

Politiit, qatserisartut peqqinnissaqarfilluunniit oqarasuaatitigut akunnerni arlalinni attaveqarfigineqarsinnaanngillat.

Sumiiffinni arlalinni attaveqaatit nalunaaqutaq aqqaninngunngitsiartoq aaqqissimassapput. Attaveqarnissamik iluatsitsinermi politiit (701448-mut) peqqinnisaqarfillu (344000-mut) sianerfigineqarsinnaapput. Qatserisartulli 113-imut suli attaveqarfigineqarsinnaanngillat.

Nuummi innaallagiaarunneq Dronning Ingridiup Napparsimmavissuanut ilaatigut unammillernartoqartitsivoq. Tamanna nunap immikkoortuani nakorsaanerup, Jesper Olesenip KNR-imut ullumi siusinnerusukkut oqaatigaa.

- Oqarasuaatit angallattakkat attaveerunnerat aatsaat nalaapparput. Uagut oqarasuaatigut attaveerunnerat nalaatereernikuuarput. Tassani oqarasuaatinik angallakkattanik atuilernikuuvugut, internettilli attaveqannginnerani tamanna iluaqutaanngilaq.

- Taama pisoqartillugu allamik iliuusissaqanngilaq, Jesper Olesen oqarpoq.

Inuit oqarasuaat angallattagaq atorlugu sianersinnaanngikkunik napparsimmavimmut orniguttariaqarput.

- Iliuuseqarsinnaanngilagut. Inuit sianerpata ornillugit ikiorusuppagut, kisianni inuit uagutsinnut sianersinnaanngillat.

- Sapinngisaq tamaat atorlugu illumi sanilerisat ikinngutit, ikiuisinnaasullu allat ikiortigiineqartariaqarput, Jesper Olesen oqarpoq.

Ajornartoornermi generatori napparsimmavimmut innaallagiaqartitsisoq

Ajornartoornermi generatori napparsimmavimmut innaallagiaqartitsiinnaavippoq. Peqqinnissaqarfimmi sulisut taamaalillutik takkuttunut nakorsiartitsiinnaavissinnaallutik.

- Takkuttut soorunami tigusarpagut. Napparsimmavimmi maani innaallagiaqarpugut, taamaalilluni inunnik passussisinnaalluta, Jesper Olesen oqarpoq.

- Taamaalilluta inuit sunersut aamma paasisinnaallutigit. Journalinulli allattuinissamik ajornartorsiuteqarlutalu nakorsaatinik tunniussinissamut atortugut ajornartorsiutigaagut. Tamannali aaqqiissuteqarfigisinnaavarput, taamaammat inuit takkuppata ikiorsinnaavagut.

Attaveqaatitigut ajortoorneq illoqarfiit pingaarnersaanni innaallagiaaruteqqangaatsiarnermik pissuteqarpoq. Innaallagiaarunneq pissutigalugu Nuuk ippassaq nalunaaqutaq unnukkut aqqanermulli taartuinnanngorpoq.

Illoqarfimmi sumiiffiit ataasiakkaat marlunngornermi ullaap tungaani innaallagiaqaqqilerput.

Nukissiorfiit Utoqqarmiut Kangerluarsunnguani erngup nukinganik nukissiorfik anorersuarnerani ajoqusersimanissaa iligineqartoq Facebookikkut siusinnerusukkut paasissutissiissutigaat.

Kalaallit Nunaanni Politiit Nuummi innaallagiaqaleqqinnissaaq nukissiorfimmit sulissutigineqartoq aamma paasissutissiissutigaat.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl