Nukissiorfiit: Ajoqut nassaaraarput, iluarsinissaali aqaguusinnaavoq sapaatit akunneriluunniit
Nukissiorfiit erngup nukiganik innaallagissiorfiata Nuup Utoqqarmiut kangerluarsunnguullu akornganiittup ajoqutaa paasineqarpoq.
Kabeli ajoqusersimasoq erngup nukiganik nukissiorfimmik kilometerinik 30-nik ungasitsigaaq.
Nukissiorfiit pisortaat Kaspar Mondrup tusagassiortunik sisamanngornerup ualigaa katersortitsinermi taama paasissutissiivoq.
- Kabelip aqqutaa Utoqqarmiut kangerluarsunnguaniittoq ajoquteqarpoq. Qulimiguulik ajoqummik ujarlertitarput maanna utereersimalerpoq.
AAMMA ATUARUK Nukissiorfiit Issittumi Sakkutooqarfillu kaabelinik misissuiartortut
Kabelip aaqqinneqarnissaata tungaanut Nuummi dieselitortumik sarfalersuisoqassaaq. Kabelip akorngutaata Issuttumi Sakkutooqarfik suleqatigalugu sumiissusersiniarneqassammat erngup nukiganik pilersuineq sisamanngornerup unnuaani unitsinneqartoq Nukissiorfiup pisortaata nassuiarpaa.
Taannalu iluarsineqartinnagu ikinneqaqqissanngikkallarpoq, suliarineqassappammi qaminngasariaqarmat.
Ullut sapaatit akunneriluunniit arlallit
Upalungaarsimasut tassaasut politiit, qatserisartut, kommuni peqqinnissaqarfillu qamittooqqinnginnissaat isumannaarneqarpoq. Maannalu sumiffiit amerlanersaat sarfaqartut Kaspar Mondrup oqarpoq.
- Illoqarfip 90-95 procentia sarfaqarpoq. Sumiiffiit ilaat suli sarfaqanngillat, tamannalu aaqqinnissaa sulissutigaarput. Pisariaqarluinnartulli soorlu peqqinnissaqarfiup, qamittuunnginnissaa innaallagissiorfitsinnit aalaakkaannerusunit isumannaarsorneqareerpoq.
Kabelillu Nuummi suliarineqarsinnaanera nutaarsiassatsialaavoq. Kabelip sinaakkutai kittorartitersimapput, taakkulu attuussaannerinit qamittoorneq pivoq.
- Naatsumik nassuiarlugu kabelitta ilaat annertunngitsumik kittorartitersimavoq. Taakku kittorarnerinit kabeleeqqat siaarsimapput, imminnullu attuunerinit qamittoortitserartarsinnaallutik.
- Iluatsitsinikkut ulluinnarlugu suliarineqarsinnaapput. Ajornartoortoqassappalli sapaatit akunneri arlallit suliarineqarsinnaapput.
AAMMA ATUARUK Upalungaarsimasut: Juullimi ullorissat qulliillu atunngitsut qamissigit
- Kabeli tamaat taarsertariaqanngilaq, maanilu suliarineqarsinnaavoq. Paasisalli kingulliit nutaajupput, qulimiguulimmillu misissuiartortitagut suli oqaloqatiginngilakka.
Ajoqutaasoq pillugu sisamanngornermi tallimanngornermiluunniit sukumiinerusumik paasisaqarfigissagitsit Nukissiorfiup pisortaata ilanngullugu oqaatigaa.
Ajoqut iluarsaanneqartillugu inuit innaallagissamik sipaarnissaaq kaammattorpai.
- Erruinikinnerulluni errorsinikinnerusoqarsinnaavoq. Qulleeqqat juullerpaluttut ikinnerusut ikumatillugit innaallagiamik sipaartoqarsinnaavoq. Innaallagiaqarniarnermut aaqqiigallarnerup ataavarnissaa qulakkeerniarlugu.
Uani assimi takuneqarsinnaavoq innaallagissamut aqqutip ajoqusernera.
