Nukissiorfiit Issittumi Sakkutooqarfillu kaabelinik misissuiartortut
Nukissiorfiit Issittumi Sakkutooqarfik suleqatigalugu Nuup Utoqqarmiut Kangerluarsunnguatalu akorannni innaallagiap sakkortuup aqqutaa misissoriartorpaat.
Misissuinermi John Siverthsenimit videoliaq qulaani takuuk.
Nuummimi sarfarlersuineq suli aalaakkaannginnerata pissutaa Nukissiorfinnit suli ilisimaneqanngilaq.
Illoqarfiit pingaarnersaat ataasinngormalli qamittooqattaarpoq. Ataasinngornermit marlunngornermut qamittooqqaneq akunnerit 18-it missaannik sivisussuseqarpoq.
Marlunngornerup pingasunngornerullu akornanni aamma qamittooqqipput, Nukissiorfiillu tamanna pissutigalugu erngup nukinganik nukissiorfiup ajornartoornermilu nukissiorfik illoqarfimmiittoq dieselimik atuisoq ataatsimut atulerpaat.
AAMMA ATUARUK Nukissiorfiit: Ajutoortoqartillugu innaallagissiorfitoqqaq Nuummi innaallagiaqartitsivoq
Sarfalersuineq suli aalaakkaanngilaq, inuillu atortorissaarutit pisariaqanngitsut tamarmik qaminngatissagaat oqartussanit kaammattuutigineqarpoq.
Utoqqarmiut Kangerluarsunnguata Nuullu akornanni kabelimik kittorartoqarsimanissaa pasitsaanneqartoq Nukissiorfiit marlunngornermi oqaatigigaluarpaat. Taamaattoqarsimanngitsorli, Nukissiorfiup pisortaata, Kaspar Mondrupip oqaatigaa.
- Erngup nukinganik nukissiorfimmiit takisoorujussuarnik kaabileqarnera qamittoornermut pissutaavoq. Anorersuarnerani kaabilit marluk attuunnerisigut innaallarujussuarnerani nukissiorfik qamittoorsimassangatinneqarpoq. Tassa kaabilit aqqutaat ajoquteqanngillat, Kaspar Mondrup pingasunngornermi ullaakkut oqarpoq nangillunilu:
- Maanna inuit pingasut Arktisk Kommando-meersut misissuiartortippagut, taakkua qulimiguulimmiit kaabilit misissussavaat. Erngup nukinganik nukissiorfiup qamittoorneranut pissutaasoq immaqa taakkua nassaarisinnaassavaat.