Upalungaarsimanermi pisortaq: Nuummi kalerrisaarineq KUKKUNERUVOQ
Nuummi kalerrisaarutit sapaatiummat ullaakkut tusarsaasimasussaanngikkaluarput.
Kalerrisaarinermi qatserisartoqarfimmuinnaq politeeqarfimmuinnarlu anngunneqarsimasussaagaluarpoq. Kommuneqarfik Sermersuumi upalungaarsimanermi pisortaq, Knud Petersen, timmisartup Nuummi mittarfimmut sillimaniarnermi minnissamut piareersarnerata kingunerisaanik Nuummi kalerrisaarutit tusarsaasimanerat pillugu taama oqarpoq.
Upalungaarsimanermi pisortap oqarnera naapertorlugu kukkuneq Nuummi juunimi qatserisartoqarfittaami pivoq.
AAMMA ATUARUK Politiit isumannaallisaanermi minneq pillugu kalerrisaarineq: Innuttaasut toqqissisimannginnissaat siunertaanngilaq
- Suu, tassa nutaamik alarmcentralitaarnikuugatta maanna nutseratta, aamma annertungaatsiartorujussuugami taqqanna suliassartai 100 procentimik suli naammassinnginnamik, 99 procent eqqaaniippoq immaqa maannakkut, taanna KNR-imut oqarpoq.
Taamaammat kalerrisaarutip illoqarfimmi tamarmi aallartinnera teknikkikkut kukkunerua?
Suu, taamaappoq. Aamma tassa Qallunaat Nunaanninngaanniit suliarinnittartutta iluarsereerpaat taannartaa. Neriuppugut maannakkut 100 procentinngorsimassasoq.
Teknikkikkut kukkusoqarnera pissutaava?
- Tassa peqqutaasimassaaq tussuunartaatigut. Tassa appisittussanngikkaluarpaa illoqarfimmut, mittarfimmiittut kisiisa appisittussaagaluarpaat, Knud Petersen oqarpoq.
Upalungaarsimanermut pisortap oqarnera naapertorlugu kukkuneq pisussaanngikkaluarpoq.
Paatsunngangangaatsiarneq
Timmisartoq Dash 8, GL 1540 sapaammi ullaakkut Nuummiit Kangerlussuarmukartilluni motorikkut ajornartorsiuteqalerpoq. Taamaammat illoqarfiit pingaarnersaannut isumannaallisaanermi minnissamut piareersarluni uteqqippoq – taamaalilluni Nuummi kalerrisaarut aallartinneqarluni.
Ajunaalernermi kalerrisaarut inuit paatsuungassutigingaatsiarlugu Facebookikkut allaaseraat.
Nuummi qatserutaasivik nutaaq. Assi: Else Olsvig
Politikommissærip Gideon Quistip kalerrisaarut ”kukkunerusinnaasoq” nalunaaqutaq 08.00-ip kingorna KNR-imut oqaatigaa.
Kukkunerunngilarli. Pisummi kingunitsianngua maleruagassat malillugit iliuuseqarsimallutik Mittarfeqarfiit nalunaarutigaat. Timmisartoqarfiup atortorissaarutaasa illutaani ingerlatsisup periusissani maleqqissaarlugu, timmisartup sillimaniarluni minnissaanut 20 minutsit sioqqullugit kalerrisaarut toorpaa.
- Mittarfeqarfiit periusissartik malillugu iliorput, aamma tamanna apeqquserneqanngilaq politiiniinngaannit. Kisianni periuseq taanna ilumut atuinnassanersoq eqqartortariaqaripput isumaqarpunga, Malene Lynge Mittarfeqarfiit attaveqaqatigiinnermut pisortaat KNR-imut oqarpoq.
Sillimaniarnermi minnermi ajoqusertoqanngitsoq
Kalerrisaarulli taanna politiinut qatserisartunullu kisimi annguttussaagaluarpoq. Illoqarfimmilu paatsuungassutigineqalertumik aallartittussaanngikkaluarluni, ulapungaarsimanermut pisortaq oqarpoq.
AAMMA ATUARUK - Naagga kalerrisaarineq kukkunerunngilaq: upalungaarsimanermut pilersaarut malinneqarpoq
Nuummi siggartaassuit sisamaapput: mittarfimmi ataaneq, Nuussuarmi haalip eqqaani taavalu illoqarfiup qaqqata eqqaani qatserutaasivikup nutaanngitsup akiatungaani. Taakku tamarmik sapaatiummat ullaakkut aallartipput.
Timmisartumi sillimaniarneq pissutigalugu mittumi ilaasut 14-iupput. Taakkunani ajoqusertoqanngilaq. Air Greenlandip oqarnera naapertorlugu ilaasut tamarmik eqqissisimapput timmisartumullu Kangerlussualiartumut tulliuttumut ilaallutik.