Upalungaarsimanermi pisortaq: Ilulissani akunnittarfiup ikuallanneranut kiassaat supoortoq pissutaasinnaavoq
Qatserisartut pujorsiortartullu Ilulissani akunnittarfimmi nutaami ikuallattumik qamisaareerlutik ullaaq tallimat qaangilaaraa aatsaat angerlarsinnaalerput.
Akunnittarfimmi suli sanaartorneqartumi ippassaq unnukkut arfineq-pingasut kingorna ikuallangaatsiartoqalerpoq.
Politiit ikuallattoqarneranut pissutaasoq paasinialeruttorpaat.
AAMMA ATUARUK Politiit: Ilulissani akunnittarfittaassami ikuallanneq misissorneqassaaq
Avannaata Kommuniani upalungaarsimanermut pisortaq, Jens Dahl ullaaq tallimat missaata tungaanut aamma sulivoq.
- Akunnittarfissap quleriiaavisa qullersaanni neriniartarfissami ikuallannera annertoorujussuuvoq. Taanna inerujussuuvoq, inimilu tassani kissangaatsiarsimavoq. Ikuallannerlu inimut tamarmut sukkasoorujussuarmik siaruaalluni, upalungaarsimasut pisortaat oqarpoq.
Sooruna ikuallalersoq?
- Tamanna ullumikkut paasiniarluassavarput. Qasuersareerutta politiit peqatigalugit suna pissutaasinnaanersoq misissussavarput. Kisianni ippassaq unnukkut apuukkama sumiiffimmi sanasut ilaat attaveqarfigaakka. Taakku ilaata kiassaat supoortoq ikuallalerneranut aallartitsisisuusinnaasoq oqaatigaa.
Gassimik puiaasamik qaartoqartoq
Upalungaarsimasut pisortaata oqarnera naapertorlugu ikuallannera annertoorujussuuvoq – taamaammat qatserisartut tamarmik sulisinnissaat aalajangerpaat. Aamma ippassaq sulisussaanngikkaluartut suliartoqquneqarput.
- Ikullattumik qamisaanermi qatserisartut 29-t sulipput. Qatserisartut ikuallaffiusumut atorlugit quleriiaat qullersaannut majuartarfikkoortussaavugut, siulliullu iseqqammitsiarnerani qaarujussuartoqarpoq, taannalu illoqarfik tamakkerlugu tusaaneqarsinnaavoq. Gassi puiaasaq qaarpoq, qujanartumillu ajoqusertoqanngilaq, upalungaarsimasut pisortaat oqarpoq.
AAMMA ATUARUK Ilulissat ikuallattoq: Illup iluanut iserlusi igalaat silaannarissarfiillu matusigit
Ikuallattoqarneranut atatillugu inunnik ajoqusertoqarneranik nalunaaruteqartoqanngilaq.
Ikuallannerani ippassaq unnukkut pujuliorujussuarpoq, taamaammat ikuallaffiup eqqaaniittut igalaanik silaannarissarfinnillu matoorinissaat illullu iluaniiginnarnissaat politiit kaammattuutigaat.
Akunnittarfissaq Kaaleeraq Poulsensvejimi sanaatorneqarpoq, anorlerneratalu pujoq Mathias Storchip Illumiullu aqqutaanut ingerlaartippaa. Taamaammat sumiiffimmi pingaartumik tassaniittoq illumiiginnaqquneqarput.
