Politiit: Ilulissani akunnittarfittaassami ikuallanneq misissorneqassaaq

Hotel Ilulissani ippassaq unnukkut ikuallattoqarneranut suna pissutaanersoq ullumi misissorneqalissaaq.

Hotel Ilulissani, Kaaleeraq Poulsensvejimiittumi, ippassaq ikuallattoqaleraluarpoq.

Ikuallanneq politiinut nalunaaqutaq 20.12 nalunaarutigineqarpoq. Kisianni nalunaaquttap akunneri marlunngortut ikuallannera ima ulorianarunnaartigaaq, politiit ikuallaffiusumi najuunniissat qatserisartunit pisariaqartinneqarnani.

Ikuallanneq unnuaq nalunaaquttap ataatsip missaani qaminneqarsinnaasimavoq.

AAMMA ATUARUK Ilulissani akunnittarfissap ikuallannera nakkutigineqarsinnaalertoq

Politiit pigaartuisa pisortaat Søren Bendtsen KNR-imut ullaaq maana taama ilisimatitsivoq.

- Ikuallannermut suna pissutaanersoq ullup ingerlanerani ullunilu qaninnerni misissorneqassaaq, Søren Bendtsen oqarpoq, nangillunilu:

Akunnittarfittaassami init qullersaanni ikuallalersimaneratut isikkoqarpoq, tamannali suli paasivinngilarput. Misissuinerit takutikkumaarpaat qanoq pisoqarsimanersoq, pigaartut pisortaat KNR-imut oqarpoq.

Inunnik ajoqusertoqanngilaq

Ikuallattoqarnerani inunnik ajoqusertoqarsimaneranik nalunaaruteqartoqanngilaq.

Ikuallanneq sakkortunerpaaffimminiimmat innersuaqarpoq pujulioqalunilu.

Taamaammat oqartussat qanittuani najugaqartut igalaaminnik matuminnillu matooraanissaannik kaammattuuteqarput.
 Ingammillu inuit Mathias Storchip aqqusernaniittut Illumiuniittullu putsumut illersoqquneqarput.

- Qanittuani najugallit igalaat matullu matussagaat kaammattuutigaarput, silaannarissaatillu aamma qamissagaat kaammattuutigalugu, Søren Bendtsen oqarpoq.

Akunnittarfittaassaq ikuallannermi qanoq ajoqusertigisimanersoq politiit suli ilisimanngilaat.