Unnugu aasaanerani nalunaaqutaq atuutilissaaq

Nunatsinni sumiiffinni amerlanerpaani aasaanerani nalunaaqutaq atuutilissaaq, tassalu imaappoq nalunaaqutaq akunnermik ataatsimik siuartinneqassaaq, taamatuttaaq inatsit nutaaq ullumimiit atuutilerpoq akunnermillu ataatsimik Danmarkip nalunaaqutaanut qanillineq piulerpoq.
Nalunaaquttap nikinneratigut ualikkut unnukkullu qaamanertusissaaq ullaakkullu taarnerusalissalluni. Assi © : Privatfoto
Allattoq Karline Platou
marsip 25-at 2023 15:46

Unnugu quliniit aasaanerani nalunaaqutaq akunnermik ataatsimik siuartissavarput, aqqaninngortillugulu, tassa nunatta kitaani Tasiilamilu.

Ittoqqortoormiinili unnuap qeqqaniit nalunaaqutaq siuartinneqassaaq, tassa unnuarumut nalunaaqutaq 01.00-nngortillugu.

Aasaaneranili nalunaaqutaq Pituffimmi Danmarkshavnimilu atuutinngilaq.

Ukioq mannali nalunaaquttap aasaaneranut nikisinnera immikkuullarissuseqarpoq

Nunatsinni nalunaaquttap ingerlarnga nikippoq

Siorna novembarip 24-iani Inatsisartut isumaqatigiillutik aalajangiuppaat nunatsinni nalunaaquttap nikisinnissaa inatsisitigut aaqqinneqartariaqartoq.

Inatsimmillu allannguineq isumaqarportaaq, nunatsinni sumiiffinni amerlanerpaani oktobarimiit akunnermik ataatsimik ilaatigut Danmarkip nalunaaqutaanut qaninnerulertussanngortugut.

 

Tamanna patsiseqarpoq, inatsit ullumimiit atuutilersoq naapertorlugu nunatta annersaani oktobarimiit ukiuunerani nalunaaquttamut uteqqittoqassanngimmat.

Tassalu imaappoq oktobarimiit nunatta, Islandip, Savalimmiut aammalu Tuluit Nunaata akunneranni nalunaaqutaq akunnernik marlunnik nikingasussanngussammat. 

Taamatuttaaq Kalaallit Nunaata, Danmarkip, Norgep, Sverigep, Tysklandip europallu kitaata sinnerani nalunaaqutaq akunnernik pingasunik nikingasussanngussammat.

Taamatuttaaq Amerikap avannaanut nikingassut akunnermik ataatsimik suli sivisunerulerpoq.

Piffissamik tassa nalunaaquttamik allannguinerup aamma malitsigissavaa, ualikkut unnukkullu qaamanerusalissammat ullaakkullu taarnerusalissalluni.