Kalaallit Nunaat Danmarkimut akunnermik ataatsimik qanillissaaq

Kalaallit Nunaata nalinginnaasumik nalunaaquttat ingerlaaqatigiiffiisa nuunneqarnissaat Inatsisartuni ippassaq pingajussaaneerneqarpoq.

Siuinnersuummi Danmarkip Europallu nalunaaqutaasa ingerlaaqatigiiffiannut qanillillugu nuunnissaq siunertarineqarpoq.

Inatsisartuni akerliusoqarani siunnersuut akuerineqarpoq, taamaammallu inatsit ukiup tulliani 25. marsi atuutilersinneqassalluni.

Ukiulli tulliani oktobarimi ukiuunerani nalunaaquttamut nikinnermi aatsaat inatsimmik allannguineq malugineqarsinnaassaaq. Danmarkimimi akunnermik ataatsimik kinguartitsisoqarpat Kalaallit Nunaanni nikisinneqassanngilaq.

AAMMA ATUARUK Nunatsinni nalunaaquttap allanngortinnissaa taperserneqarluartoq

Nalunaaquttap allanngortinneqarnissaanut tunngavilersuutit ilagaat Kalaallit Nunaata Danmarkimik Europamillu ulloq unnuarlu ingerlanerani niuersinnaanera akunnermik ataatsimik sivitsorneqassammat.

Siunnersuut atuutilersinneqarpat Kalaallit Nunaat Europap kitaata sineriaata Amerikallu Avannarliup kangiata sineriaata qeqqanniilissaaq illugiimmik akunnernik pingasunik nikingassuteqartunik.

Kalaallit Nunaata sinnera

Kalaallit Nunaanni nalunaaquttat ingerlaaqatigiiffii sisamanut ullumikkut agguarneqarsimapput. Nalunaaquttat ingerlaaqatigiiffiat nalinginnaasoq UTC -3-miippoq, nunap annersaani atuulluni. Ittoqqortoormiit nalunaaquttat ingerlaaqatigiiffiini UTC -1-imiippoq, Danmarkshavn UTC +0-imiilluni, Pituffillu (Thule Air Base) UTC -4-miilluni.

Naalakkersuisut inatsimmik siunnersuuteqartuupput. Nunami nalunaaquttat ingerlaaqatigiiffiisa sinnerisa attorneqarnissaat siunertarineqanngilaq. Inatsisartunili siunnersuutip siullermeerneqarluni oqaluuserineqarmat nuna tamakkerlugu nalunaaquttat ingerlaaqatigiiffiinut ataatsimiinnissaat partiinit amerlanerussuteqartunit iluaqutaassangatinneqarpoq.

AAMMA ATUARUK Justus Hansenip nunatsinni assigiimmik nalunaaqutaqarnissaa kissaatigigaa

Nalunaaquttalli ingerlaaqatigiiffii ittoqqortoormiini, Danmarkshavnimi Pituffimmilu massakkut inissisimanerisa attanneqarallarnissaat siullermik aalajangiusimaneqarpoq, Naalakkersuisulli suliaq ingerlateqqissavaat, ilaatigut Ittoqqortoormiini innuttaasut isumaat tusarniarneqaqqaassallutik.

Partiinit arlalinnit aamma kissaatigineqarsimavoq aasaanerani piffissaq atorunnaarsivinneqassasoq. Kalaallit Nunaanni aasanerani piffissap atorunnaarsinneqarnissaa Inatsisartuni 2019-imi akuersissutigineqarpoq, Naalakkersuisulli EU-p aamma taamaaliornissaanik utaqqeqqaarlutik.

Tusarniaanermut akissutit pitsaasut

Siunnersuut Kalaallit Nunaanni selskabinut, peqatigiiffinnut allanullu tusarniutigineqarsimavoq. Tusarniaanermi akissutit pitsaasorujussuusimapput.

- Sulisitsisut UTC -3-mit UTC -2-mut nuunnissaq ajoqutissartaqartinngivippaat, Sulisitsisut tusarniaanermut akissutiminni allapput.

Air Greenland aamma isumaqataavoq.

- Kalaallit Nunaata Danmarkillu akornanni timmisartuussinernut kiisalu inuttat siumut utimullu nussornerannut atatillugu nalunaaquttap akunnernik sisamanik nikingassuteqarnera pilersaarusiornermut aalajangiisuulluinnarpoq, Air Greenland allappoq.

Siunnersuullu Air Greenlandimut kisimi iluaqutaanavianngilaq, timmisartuutileqatagiinnut Kalaallit Nunaannut Kalaallit Nunaanniillu timmisartuussisartunut aamma iluaqataassalluni. Mittarfissuassat ammarpata tamanna iluaqutaasinnaavoq.

Sunniuteqaratarsinnaavorli ajortumik. Tamatumani pingaartumik sinimmut aamma ullup unnuallu ingerlasarneranut sunniuteqarsinnaalluni seqineq nalinginnaasumit akunnermik ataatsimik siusinnerusumik nuillunilu tarrittalerpat.

Inatsisinut Ataatsimiititaliamit taamaammat Naalakkersuisunut piumasarineqarpoq Islandimi nalunaaquttat ingerlaaqatigiiffiannik nuussinermi sunniutit pillugit paasissutissat pillugit isummissasut.

Tassani nalunaaqutaat ingerlaaqatigiiffiinit UTC +0-imit UTC -1-imut nuussimapput. Inuusuttut qanoq sunnerneqarsimanerat pillugi tamaani misissuisoqarsimavoq ilisimatusarnikkullu suliniummik angisuumik aallartitsisoqassalluni.

- Paasissutissanik taakkuninnga Kalaallit Nunaanni ilisimatusartut Peqqinnissaqarfiullu pissarsisinnaanissaat Naalakkersuisut pingaartippaat, siunnersuutip pingajussaaneerneqarnerani Múte B. Egede oqarpoq.