Ilulissani suliffeqarfiit namminersortut pisortallu suliffeqarfii unnuakkut ullaassakkullu nalunaaqutap pingasut arfernullu akornanni tillinniarfigineqaqattaartut Ilulissani politiinit Sebastian Bech tusagassiutinut allappoq. 

Tillinniat paasisaanissaat tillinniarnerillu pinaveersaartinnissaat anguniarlugit suliffeqarfiit innuttaasullu ikiuuteqqullugit Sebastian Bech kaammattuivoq. 

- Suliffeqarfiit qimakkaanni igalaat matullu matulluarlugillu parnaarneqartarnissaat eqqaasitsissutigissavarput kaammattuutigalugulu aningaasanik aningaasanngortikkuminartunilluunniit qimatsisoqartannginnissaa, Sebastian Bech allappoq. 

Suliffeqarfinni nakkutilliinikkut videoliat politiinut tunniunneqarnissaat aamma kaammattuutigineqarpoq.

Innuttaasut nioqqutissanik tillitaasimasinnaasunik neqeroorfigitissagaluarunik politiinut saaffiginneqquneqarputtaaq. 

- Angerlarsimaffimmi suliffeqarfimmiluunniit tillinniarfigitinneq nuanninngilaq, pinerlunneruvoq inuiaqatigiinnullu akisusinnaalluni. Taamaammat innuttaasut suliffeqarfiillu tillinniat pisarineqarnissaannut unitsinnissaannullu ikiuunnissaat neriuutigaarput, Sebastian Bech allappoq.

Innuttaasut pasinarsinnaasunik takunnissimasut takunnissagaluarunilluunniit 70 14 48-mut attaveqaqquneqarput.