Unnerluutigineqartoq tarnimigut innarluutilimmik arnamik Nuummi kinguaassiutitigut atornerluisutut pinngitsuunerartoq
![](/sites/default/files/styles/image_934x467/public/kredsret_sermersooq_2_vinter_2017.jpg?itok=HgNGkLko)
Naqqiissut: KNR-ip suliami pissutsit pinngitsaaliinertut nassuiaatigigaluarpai. Eqqartuussulli Pinerluttuliornermi Inatsit §78 eqqarsartaatsimigut innarluuteqartumik kinguaassiuutitigut atoqatiginninnermut tunngavoq. Eqqartuunneqartup arnaq piumanngitsoq atoqatigisimagaa unnerluussissummi allassimavoq. KNR-ip kukkussut utoqqatsissutigaa.
MIANERSOQQUSSUT: Ilanngutassiaq nuanninngissinnaasunik paasissutissartaqarpoq.
Angutip 31-nik ukiullip arnamut eqqarsartaatsimigut innarluutilimmut pinngitsaaliisimasutut unnerluutigineqarnera pillugu eqqartuussivimmi suliaq Nuummi eqqartuussisoqarfik Sermersuumi ullumi qulingiluanut aallartippoq.
Pisoq qajassuaatsoq unnerluussissut naapertorlugu 2021-mi marsimi ullaakkut pisimavoq, angutip arnaq Qinngorpumi najukkami atisaajariarlugu piumanngitsoq atoqatigisimavaa.
Angutip tamatuma kingorna inernissami tungaanut arnap anisoortissagaani pinngitsaalisimavaa.
Arnaq piffissami tassani 28-nik ukioqaraluarluni 13-it missaannik ukiulittut eqqarsartaaseqarpoq.
Angut eqqartuussivimmi suliami kinguaassiutitigut atornerluisimannginnerarpoq. Taassumali atoqatigiissimanertik nassuerutigaa, arnarli eqqarsartaatimigut innarluuteqarnersoq ilisimannginnerarlugu.
Facebookikkut allaqatigiittut
Unnerluutigineqartup arnap ania meeqqat atuarfianni atuarfeqatigisimallugu oqaatigaa. Taakku Facebookikkut 2021-mi allaqatigiipput, tamatumalu kingorna oqarasuaatikkut atoqatigiinnermut tunngasumik atoqatigiissimapput.
Tamanna akuersissuteqarnertut paasisimavaa.
Angut arnap Qinngorpumi najugaanukarsimalluni paasissutissiissutigaa, tamatumalu kingorna arnaq ineeqqamukarsimavoq.
Unnerluutigineqartup oqarnera naapertorlugu maanna atoqatigiissallutik oqarfigigamiuk arnaq naaggaarsimavoq.
Unnerluutigineqartup arnap pisup kingorna killissaminik qaanngiiffigitissimalluni allaffigisimagaani angutipalaajunerarsimagaanilu oqaatigaa. Tassanilu arnapalaajunerarlugu akisimavaa.
Tamatumalu kingorna atoqatigiillutik.
Angutip arnaq eqqarsartaatsimigut innarluuteqartoq atoqatigiinnerup kingorna aatsaat paasisimallugu oqaatigaa.
Arnaq unnerluussissut naapertorlugu skizofrenimik nappaateqarlunilu ineriartornermigut innarluuteqarpoq.
Nakuuserneq siorasaarinerlu nassuerutigigai
Angut pissutsinut allanut aamma unnerluutigineqarpoq.
Kinguaassiutitigut atornerluinerup kingorna ukioq ataaseq qaangiuttoq angutip angut alla siniffimmut nakuuserfigisimavaa.
Pinerluuteqartup pinerlineqartoq siniffimmut ajassimagaa, kaajallatsissimagaa, siutaatigut saamerlikkut sakkortuumik pussoqqasimagaa uluaatigullu saamerlikkut kiillugulu qungasiatigut qitsussimagaa minutsinilu qulinit 15-inut siniffimmi nikinnaveerseqqasimagaa unnerluussissummi allassimavoq.
Pisumut tassunga atatillugu pinerluuteqarsimasorineqartup angut assaminik illuttut toqqusasseqqasimavaa.
Unnerluussisussaatitaasup oqarnera naapertorlugu pinerluuteqarsimasorineqartoq pisumi tassani toqqusasseeqqanerminut atatillugu minnerpaamik pingasoriarluni pinerluuteqarfigineqartumut “toqussavakkit”-mik oqartarsimavoq.
31-nik ukiulik pissutsini marlunni taakkunani nakuusernermut siorasaarinermullu atatillugu eqqartuussivimmi nassuerpoq.
Pinerluuteqarsimasorineqartup qaammatini aqqaneq-marlunni pineqaatissinneqarsimasunut inissiisarfimmiittussanngortinneqarnissaa tarnimigullu innarluutilimmut arnamut 50.000 koruuninik taarsiissuteqarnissaa unnerluussisussaatitaatip piumasaraa.