Unnerluussut: Arnaq innarluutilik 13-inik ukiulittut sianissuseqartoq Nuummi kinguaassiutitigut atornerlunneqartoq
Naqqiissut: KNR-ip suliami pissutsit pinngitsaaliinertut nassuiaatigigaluarpai. Eqqartuussulli Pinerluttuliornermi Inatsit §78 eqqarsartaatsimigut innarluuteqartumik kinguaassiuutitigut atoqatiginninnermut tunngavoq. Eqqartuunneqartup arnaq piumanngitsoq atoqatigisimagaa unnerluussissummi allassimavoq. KNR-ip kukkussut utoqqatsissutigaa.
MIANERSOQQUSSUT: Ilanngutassiaq nuanninngissinnaasunik paasissutissartaqarpoq.
Arnaq 28-nik ukiulik, innarluutilik aqqaneq-marlunnik aqqaneq-pingasunilluunniit ukiulittut sianissuseqartoq angummit 31-nik ukiulimmit Nuussuarmi kinguaassiutitigut atornerlullugu atoqatigineqarsimasoq Kalaallit Nunaanni Politiini unnerluussisussaatitaasup oqaatigaa.
Pisoq qajassuaatsoq unnerluussissut naapertorlugu 2021-mi marsimi ullaakkut pisimavoq, tassanilu angutip arnaq atisaajariarlugu piumanngitsoq atoqatigisimavaa. Unnerluussissut naapertorlugu arnaq ineriartornermigut innarluuteqarlunilu skizofreneqarpoq.
Angutip tamatuma kingorna inernissami tungaanut arnap anisoortissagaani pinngitsaalisimavaa.
KNR-ip Nuussuup suani pinerluuteqartoqarsimanersoq apeqqutigigaluarpaa. Taakkuli tamanna paasissutissiissutigerusunngilaat.
Toqqusassiineq siorasaarinerillu
Pisoq qajassuaatsoq pisimasuni kisimiinngilaq.
Suliami unnerluussissussaatitaasup oqarnera naapertorlugu pasineqartoq ukiup ataatsip qaangiunnerani tassa 2022-mi aggustimi angummut siniffimi nakuusersimavoq. Pinerluuteqartup pinerlinneqartoq siniffimmut ajassimagaa, kaajallatsissimagaa, siutaatigut saamerlikkut sakkortuumik pussoqqasimagaa uluaatigullu saamerlikkut kiillugulu qungasiatigut qitsussimagaa minutsinilu qulinit 15-inut siniffimmi nikinnaveerseqqasimagaa unnerluussissummi allassimavoq.
Pisumut tassunga atatillugu pinerluuteqarsimasorineqartup angut assaminik illuttut toqqusasseqqasimavaa.
Unnerluussissut naapertorlugu nakuuserneq sakkortungaarmat pinerluuteqarfigineqartoq tamatuma kingorna ulussakkut qutukkullu aappillerneqarpoq, siutaata saamerliup sulluata silataani tungujorneqarpoq, kiisalu qungasiani talerperlikkut sisamanik qitsunneqarlunilu unimigut saamerlikkut aagialitsersimavoq.
Pinerluuteqarsimasorineqartoq unnerluussissut naapertorlugu pisumi tassani toqqusasseqqanerminut atatillugu minnerpaamik pingasoriarluni pinerluuteqarfigineqartumut “toqussavakkit”-mik oqartarsimavoq.
Pinerluuteqarsimasorineqartup qaammatini aqqaneq-marlunni pinerluuteqarsimasunut inissiisarfimmiittussanngortinneqarnissaa unnerluussisussaatitaasut piumasaraat.
Suliaq Eqqartuussisoqarfik Sermersuumi apriilip ulluisa 24-anni suliarineqassaaq.
