Unnerluussisussaatitaasut 11-nik ukiulimmik Aasianni toqutsinermut suliami ukiuni qulini isertitsivimmiitsitsiniartut

Aasianni ukioq kingulleq tujorminartumik nassaartoqarpoq.

Eqimattat namminneq piumassutsiminnik ikiuuttut niviarsiaqqamik unnukkut angerlarsimanngitsumik ujaasipput. Niviarsiaraq KJ Greenland Aasiaat aamma Wille Brandsvejip akornanni tummeqqani toqungasoq unnukkut nassaarineqarpoq.

Suliaq taanna Ilulissani Eqqartuussisoqarfik Qaasuitsumi decembarip ulluisa arfineq-pingajuanni qulingiluaannilu suliarineqassaaq. Angullu niviarsiaqqamik novembarip ulluisa 26-anni nalunaaqutaq 20.30-p 20.40-llu akornanni toqutsisimasutut unnerluutigineqarpoq.

Tamanna KNR-ip allagaatinik takunnissinnaatitaaffigisaani, politiit unnerluussissutaanni, allassimavoq.

AAMMA ATUARUK Angut aqqanilinnik ukiulimmik toqutsisimasutut pasineqarluni tigummigallagassanngortinneqartoq

Unnerluussisussaatitaasut pineqartoq pinerlussimasututut eqqartuunneqassappat ukiuni qulini pineqaatissinneqarsimasunut inissiisarfimmiitsinneqarnissaa piumasarigaat, unnerluussissummi allassimavoq.

Angut taamani 27-nik ukioqartoq toqutsinermik sapaatip akunnerata missaa qaangiuttoq tigusarineqarpoq, angutillu niviarsiaqqamik toqutsisimanini nassuerutigigaa politiit kingusinnerusukkut oqaatigaat. Taanna tigusarineqaramili tigummigallarneqalerpoq.

AAMMA ATUARUK Politiit: Aasianni toqutsisoqarnerani pasisap toqutsisimanini nassuerutigaa

Toqutsisoqarneranut suliaq Aasianni najugaqartunut sunniuteqangaatsiarsimavoq. Tamanna Arqaluk Brandt Johansenip Aasianni najugaqartup ulluinnarnilu Kommune Qeqertaliup radiani ulluinnarni aqutsisup oqaluttuaraa. Taassuma sulinermini Aasianni inuppassuit attaveqarfigisarpai.

- Isumaqarpunga Aasianni innuttaasut maannakkut, imatut pisoqarfiani oqimaattorsiortut. Misigissutsikkut assoroornarpoq, tassami soorlu ilaatigut takugipput nutaarsiassat ilaanni, nalinginnaasuunngilaq niviarsiaraq aqqanilinnik ukiulik toquinnarsinnaasoq,

- Taamaattumik taamaattumik pisoqarfiani isumaqarpunga innuttaasunut oqaimaattorsiornartuuvoq, Arqaluk Brandt Johansen oqarpoq.