Politiit: Aasianni toqutsisoqarnerani pasisap toqutsisimanini nassuerutigaa
Niviarsiaqqamik aqqanilimmik ukiulimmik toqungasumik Aasianni nassaartoqarneranut paasissutissanik nutaanik saqqummiussisoqarpoq.
Toqutsisimasutut pasisap toqutsisimanini nassuerutigisimagaa, politiit paasiniaasartuisa aqutsisuata Simon Andrésip Sermitsiaq.AG-mut oqaatigaa.
- Paasiniaanermi suliaq ingerlalluarpoq. Suliami aalajangiisussatut pingaaruteqartut inissereerput. Suliami qulanngilluinnarpugut, Andrés oqarpoq.
AAMMA ATUARUK Angut aqqanilinnik ukiulimmik toqutsisimasutut pasineqarluni tigummigallagassanngortinneqartoq
Toqutsisimasutut pasisap toqutsinnginnermini niviarsiaraq ilisarisimanngikkaa aamma paasineqarpoq.
- Suliaq imminut ilisarisimanngitsut akornanni toqutsinermut tunngassuteqarpoq. Tamanna isumaqarpoq niviarsiaraq pasisarlu imminnut ilisarisimanngitsut. Nunatsinni taamaattoqarnera nalinginnaanngilaq, Simon Andrés Sermitsiaq.AG-mut nassuiaavoq.
Pasineqartoq eqqarsartaatsimigut misissorneqassasoq
Toqutsisimasutut pasineqartoq eqqarsartaatsimigut maanna misissorneqassaaq, misissuinerlu qaammatialunnik sivisussuseqarsinnaalluni.
Suliami uppernarsaataasinnaasut arlallit Danmarkimut aamma nassiunneqarsimapput.
Niviarsiaraq aqqanilinnik ukiulik KJ Greenland Aasiaat aamma Wille Brandtsvejip akornanni majuartarfinni toqungasoq novembariop ulluisa 27-anni tallimanngornermi nassaarineqarpoq.