Unnerluussisussaatitaasup hashimik annerusumik eqqussisimasorigai
Unnerluussisussaatitaasup, Tobias Bergip, hashimut suliaq nunatsinni uukapaatitsiniarnermik suliani annerpaattut taallugu oqallissaarummut innersuussilluni inaarutaasumik saqqummersitsinini aallartippaa.
Oqallissaarummullu isumaqataanerarpoq, unnerluutigineqartummi hashimik anngiortumik eqqussisutut unnerluussutigineqartumit annerujussuarmik eqqussisimassasut isumaqarami.
Unnerluussisussaatitaasulli tamanna uppernarsarsinnaanngilaat, taamaammat angutit arfinillit hashimik 63 kilomik anngiortumik eqqussisimasutut unnerluutigineqarput, arnarlu ataaseq hashimik 27 kilomik anngiortumik eqqusseqataasimasutut unnerluutigineqarluni.
AAMMA ATUARUK Hashi pillugu suliami unnerluutigineqartoq oqarasuaammik eqqusseriarsimasoq
Tatiginanngitsumik nassuiaateqarnerarai
Tamatuma kingorna unnerluussisussaatitaasup inunnut arfineq-marlunnut unnerluussutit nassuiarpai, unnerluutigineqartullu hashimik anngiortumik eqqussisimasutut eqqartuunneqarnissaannut tunngavilersuilluni.
Unnerluussisussaatitaasoq unnerluutigineqartunit nassuiaatigineqartut uppernanngitsuusoralugit, ataqatigiinngissoralugit sallunertaqarsoralugillu eqqartuussivimmut arlaleriarluni oqarpoq.
AAMMA ATUARUK Hash pillugu suliaq annertooq naammassingajalerpoq
Unnerluutigineqartut imminnut ilisarisimavallaannginnermik nassuiaateqarnerat eqqunngitsoq oqarasuaatikkut oqaloqatigiinnerinit politiinit anngiortumik naalaarneqartunit takutinneqartoq, unnerluussisussaatitaasoq ilaatigut isumaqarpoq.
Arfininngornermi sapaammilu saqqummersitsisoqassaaq, tassani siullermik unnerluussisussaatitaasut kingornalu unnerluutigineqartut arfineq-marluk illersuisui suliami uppernarsaatinut nassuiaatiminnik saqqummiussissallutik.