Hashi pillugu suliami unnerluutigineqartoq oqarasuaammik eqqusseriarsimasoq

Hashi pillugu suliami annertuumi unnerluutigineqartoq ataaseq oqarasuaammik angallattakkamik Nuummi pineqaatissinneqarsimasunut inissiisarfimmut anngiortumik eqqusseriarsimavoq. Tamanna ullumi eqqartuussinermi saqqummerpoq.
Allattoq Jonas Fievé
juunip 23-at 2018 14:35
Nutserisoq Ivik Kristiansen

Unnerluutigineqartup Sisimiuni pineqaatissinneqarsimasunut inissiisarfimmeeqatigisaminit oqarasuaammik angallattakkamik pisisimalluni nassuerutigaa.

Nassuiaataa naapertorlugu oqarasuaat ilaqutaminut sianernissaminut atorniarsimavaa, sianernissaminut qinnuteqaataa akuerineqarsimanngimmat.

Oqarasuaat puussiami qajuusalimmi nassaarineqarpoq. Unnerluutigineqartulli ilaatigut arnaatimi normua puigorsimagamiuk oqarasuaat atorsimanngingajallugu nassuiaatigaa.

AAMMA ATUARUK Aningaasanik nuussisarnerit eqqumiitsut hashi pillugu suliamik aallarniisuupput

Nuummut nassarnianngikkaa

Ilaqutai Nuummi najugaqarmata, sooq oqarasuaat Nuummut nassassallugu pisariaqarsimanersoq unnerluussisussaatitaasup, Tobias Bergip, aperimmani, oqarasuaat Nuummut nassarnianngikkaluarlugu unnerluutigineqartoq akivoq.

Politiit oqarasuaatip imarisaanik misissuinissaannut akuersivoq, oqarasuaaterli atorsimanngingajammagu SIM-kortimut isissutissaq puigorsimallugu oqaatigaa.

AAMMA ATUARUK Allakkerivimmi sulisut hashimik eqquissueqataapput

Isissut eqqamanngikkaa

Politiit oqarasuaatip imarisaanik aamma sianertut sianerfigisallu allattorsimaffiannik takusaqarsinnaassagunik, soqutiginartunik nassaarsinnaassanersut nalullugu aamma oqarpoq.

Hashi pillugu suliami annertuumi inunnut arfineq-marlunnut hashimik 63 kilomik Danmarkimit nunatsinnut anngiortumik eqqussisimasutut unnerluuteqarfiusumi ullut kingulliup tulliani ataatsimut unnerluussutigineqartunik amerliliisoqarpoq.

Unnerluutigineqartut ukiuni pingasuni qaammatillu qulingiluanit ikinnerpaamik ukiut tallimanut pinerluuteqarsimasunut inissiisarfimmiittussanngortinneqarnissaat unnerluussisussaatitaasut piumasariniarpaat.

AAMMA ATUARUK Hashi annertooq pillugu eqqartuusisoqalerpoq