Unnerluussisussaatitaasoq, illersuisoq, ilisimannittorlu: Eqqartuussivimmi suliassap kinguartinneqarnera uggornarpoq

Mittarfik quasarmat Nuullu sarfaaruteqqasarmat suliaq KNI-p pisortarisimasaata, Peter Grønvold Samuelsenip, kannguttaatsuliorsimaneragaaneranut tunngasoq, eqqartuussivimmi pilersaarutaasutut ullumi aqagulu suliarineqartussaagaluartoq kinguartinneqarpoq.

Suliami illersuisoq unnerluussisussaatitaasorlu Nuummiit Sisimiunut Eqqartuussiveqarfik Qeqqani eqqartuussinissamut peqataajartorlutik aallartussaaagaluarput.

Nuummiilli Nuummullu timmisartukkut angallassinissat tamarmik sila pissutigalugu taamaatiinnarneqarmata, taakkua Sisimiunukanngillat.

- Soorunami ajuusaarnarpoq. Eqqartuussivimmi suliaq naammasserusukkaluarparput, unnerluussisussaatitaasoq, Anne Clinton oqarpoq.

Taassuma Nuummi qamittooqqaneq pissutigalugu eqqartuussivimmi suliap video atorlugu ingerlanneqarnissaa aamma periarfissaanngitsoq nassuiaatigaa.

Illersuisuttaaq kinguartitsineq aamma uggoraa.

- Uggornartorujussuuvoq. Suliamit uannga ingerlariaqqinnissaq tamatta qilanaarisimagaluaripput isumaqarpunga. Sullitara suliamut atatillugu nammineq ilisimasanimik nassuiaateqarlunilu saqqummeerusuppoq, taamaammat eqqartuussisoqarsinnaaleqqipallannissaa qilanaaraarput, Peter Grønvold Samuelsenip illersuisua, Finn Meinel oqarpoq.

KNR-ip suliami ilisimannittut ilaat attaveqarfigaa, taassumali kinguartitsisoqarnera aamma pakatsissutigaa.

- Tarnikkut piffissami sivisuumi piareersarsimagaluarpugut. Suliamimmi taamaattumik unnerluutiginninneq oqitsuunngilaq. Taamaammat suliap tamarmi naammassinissaa qilanaarisimagaluarparput. Taamaammat pakatsinarpoq, suliami ilisimannittoq, kinaassutsiminik isertuusserusuttoq oqarpoq. Taassumali kinaanera KNR-ip ilisimavaa.

Ullut marluk atorneqassasut

Illersuisoq unnerluussisussaatitaasorlu sooq eqqartuussinissamut ulloq taannarpiaq aatsaat aallarniarsimanersut, KNR-ip apeqquteqarfigai.

- Ullormi taanna angalasoqartussaavoq. Tamanna eqqartuussivimmut isumaqatigiissutaavoq, tamannalu eqqartuussiviup ilisimavaa, taamaammat taakku periarfissaapput, Finn Meinel oqarpoq.

Anne Clinton siusinnerusumi Sisimiunukarnissaminut aamma periarfissaqarsimanani oqarpoq:

- Nukinginnarluinnartunik allanik aamma suliassaqarpoq, illersuisullu unnerluussisussaatitaasullu ullumikkut ulloq ataatsimut periarfissarisimavaat.

Eqqartuussivimmi suliarinninnissamut ullut marluk tamarmik taamaatinneqarnerat suliap ullormi ataasiinnarmi naammassineqarsinnaannginnera pissutaasoq, Anne Clinton nassuiaavoq.

- Tamanna ilisimannittunik aggersarneqartunik pissuteqarpoq. Ilisimannittut katillugit arfineq-pingasut aggersarneqarput, tamatumalu saniatigut unnerluutigineqartoq aamma nassuiaateqartussaalluni. Tamannalu ullormi ataasiinnarmi naammassineqarsinnaanngitsoq illersuisorlu isumaqarpugut, unnerluussisussaatitaasoq oqarpoq, nangillunilu:

- Eqqartuussivimmi suliarinninnissamut ulluliussat marluk tamaasa pisariaqartippagut. Taamaammat eqqartuussiviup, illersuisup unnerluussisussaatitaasullu periarfissaqarfigisaanik nutaamik nassaarnissaq utaqqissavarput. Neriuppugut tamanna piaartumik pisinnaassasoq.

Eqqartuussisoqarfik Qeqqata suliap qaqugu suliarineqarnissaa aamma oqaatigisinnaanngikkallarpaa.

Tamannali decembarimi pinavianngitsoq, nalunaarutigineqarpoq.

Pinngitsuunerartoq

KNI-mi pisortaanerusimasoq suliffeqarfimmi atorfeqarnermi nalaani arnanut katillugit tallimanut kannguttaatsuliorsimasutut pasineqarpoq.

Unnerluussissut KNR-ip takunnissinnaaffigisaa naapertorlugu kannguttaatsuliornerit nassuiaatigineqartut KNI-p allaffiani aamma suliffimmut atatillugu angalanerni 2016-ip 2021-llu akornanni pisimapput.

Unnerluussisussaatitaasut unnerluutigisap qaammatini pingasuni pineqaatissinneqarsimasunut inissiisarfimmiinnissaa piumasaraat, Peter Grønvold Samuelsenili pinngitsuutinneqarnissani anguniarpaa.

KNI-mi pisortaasimasoq kannguttaatsuliorsimasutut politiinut unnerluutigineqartoq marsimi saqqummiunneqarpoq.

Peter Grønvold Samuelsen tamanna sioqqutitsiarlugu atorfimminit soraarpoq.

Taassuma soraarneranut suna pissutaanersoq piffissami tassani saqqummiunneqanngilaq.

Peter Grønvold Samuelsenili suliffeqarfiup iluani innimiilliortoqarsimasinnaaneranik misissuisoqarnerata kingunerisaanik soraaqquneqaqqaariarluni KNI-mit soraarsinneqarsimasoq KNI-p siulersuisuisa nutaat oktobarimi paasissutissiissutigaat.

Peter Grønvold Samuelsen KNI-mi ukiuni arfineq-marlunni pisortaaneruvoq.