KNI-mi siulersuisut: Ukioq manna quarsaarnartoqarpoq
- KNI A/S-imi ukioq naatsorsuusiorfiusoq qaangiuttoq nalinginnaasuunngilluinnarpoq.
- Siorna ukiumi naatsorsuiffimmi suliffeqarfik ilorraap tungaanut suli ingerlaartoq nalunarutigaarput. Aamma suli ingerlalluartorpassuaqarpoq.
- Ukiunili qaangiuttuni pisut tamaasa ilisimasaqarfigisimakkigut ajoraluartumik aamma paasineqarpoq.
- 2010-mili KNI-p quersuarniititanik naatsorsuisarnera nalunaarsuisarneralu naatsorsuinermik aaqqissuussatigut kukkuneqarnikuuvoq.
- Tamatuma kinguneranik, 2010-miit ukiuni siullerni quersuarmiititat 70 miliuuni koruuninik annertuallaamik nalilerneqarsimapput kiisalu ukiuni kingullerni arfineq marlunni 50 miliuuni koruuninik annertuallaamik nalilerneqartarnikuullutik.
- KNI-p naatsorsuinermut aaqqissuussai inuup allannguineratigut kukkunernik pilersitsisimapput, kinali allannguisimanersoq KNI-mit ilisimaneqanngilaq.
- Kukkunerup kinguneranik, ingerlatsiviup piginnittutut aningaasaliissutit, decembarimi ukiup affaanut naatsorsuutimini 50 miliuuni koruuninik nalikillisittariaqalissavai.
- Kukkunerit kingunerannik KNI naapertorlugu "ingerlatsiviup aningaasaqarnikkut inissisimaneranut ingerlatsinermullu aningaasartuutinut atatillugu sunniuteqassanngillat.”
Suliffeqarfimmi naatsorsuusiornerlunneq, kinguaassiutitigut kanngutsaatsuliornerit politiinullu unnerluutiginninnerit oqaluttuarineqaqattaarput.
Taakkuuppullu suilersuisut siulittaasuata Lars Borris Pedersenip ataatsimiinnermi aallartinnermini eqqartugai siulliit.
AAMMA ATUARUK KNI kanngunartuliorfiusareertoq piginnittut ataatsimeersualersut
Whistleblowerikkut ilisimatitsisarsimasut arlaariit sulisut akornanni ingerlalluartoqannginnera suliffeqarfimmilu naatsorsuutitigut eqqunngitsumik ingerlasoqarnera oqaluttuarisimavaat. Pisut tamakku qanoq ittuunerat qanorlu pimooruttariaqassusaat tunngavigalugu ilaatigut eqqartuussissuserisut suliffeqarfiillu kukkunersiuinermik suliallit ikiorsiullugit sukumiisumik misissuineq ingerlanneqarpoq.
Misissuinerit ilaatigut suliunnaarsitsinermik kiisalu peqquserlulluni allagaasiortoqarsimaneranik peqquserluttuliortoqarsimaneranillu politiinut nalunaarutiginnittoqarneranik kinguneqarput.
Allanik nalunaarutiginnittoqarsinnaasoq
Pisunut ataasiakkaanut tunngatillugu akileraaruserinermut aqutsisoqarfik ilisimatinneqarpoq. Sulilu allanik nalunaarutiginnittoqarsinnaasoq, KNI paasissutissiivoq.
- Suliffeqarfiup iluani misissuititsinerup uppernarsarpaa uninngasuutit 2013/2014-imi kukkusumik naatsorneqarsimasut, kukkusumillu naatsorsuisimaneq 2013/2014-imut ukiunullu tulliuttunut aamma sunniuteqarsimavoq, Lars Borris Pedersen oqarpoq.
- Suliffeqarfiup nammineerluni misissuititsinerani siullermi kukkuneq inunnit pilersinneqarsimasoq nalilerneqarpoq. Siulersuisut aallaqqaammut naatsorsuutinut sunniutit kukkunersiuisut suliffeqarfiannit Deloittemit missortinneqarnissaat aalajangerpaat.
AAMMA ATUARUK KNI pisortartaartoq
Tamatuma kingunerisaanik siulersuisut misissuinerup annertusineqarnissaa kukkunersiuisullu suliffeqarfiat alla tassa PwC ilanngutitinneqarnissaa aalajangerpaat.
- Tassani suliffeqarfiup uninngasuutaani kukkusumik nalunaarsuisoqarsimanerani inuup qarasaasiatigulluunniit kukkussuteqartoqarsimara pissutaanngitsoq inerniliunneqarpoq.
- Tassanili naatsorsuuserinermik immikkikkoortortaqarfimmi sulisut pingaarutilimmik inissisimasut qanimut suleqatiginerisigut ukiuni arlariinni piaaraluni naatsorsuutit allanngortiterneqartarsimasut, allanngortiterisarsimanerillu ulluinnarni aqutsisunut, siulersuisunut kukkunersiuisunullu isertuunneqartarsimasut pasitsaanneqarpoq, Lars Borris oqarpoq.
Unnerluussineq soraarsitsinermik kinguneqartoq
Naatsorsuutilli pillugit suliaq ilungersunartoq suliffeqarfissuarmi pisut ilungersunartut ilaminiinnaraat.
Pisortaasimasumut, Peter Grønvold Samuelsenimut kinguaassiutitigut unnerluutiginninnerit arlallit aamma pipput.
Suliffeqarfissuup siulersuisuisa ingerlalluanngitsoqarnera suliffeqarfiullu Sisimiuni allaffiani kinguaassiutitigut narrunarsaanerusinnaasut sulisunit kinaassutsiminnik isertuussisunit ukiup aallartinnerani tusaqqaaraat, Lars Borris Pedersenip oqaatigaa.
- Tamanna aallaqqaammut misissueqqaartoqarnissaanik pisariaqartitsinermik ersersitsivoq, tamannalu pisortaanerup 2021-mi marsip ulluisa 25-annit suliunnaarnissaannik siulersuisut isumaqatigiissuteqarneranik kinguneqarpoq, siulersuisut siulittaasuat oqarpoq.
Tamanna pissutigalugu Peter Grønvold suliunnaarpoq, piffissalli ingerlanerani suli akissarsiaqartinneqarluni. Akissarsiaqartitsinerli kingusinnerusukkut unitsinneqarpoq.
- Pissutsit kingornatigut paasineqartut tunngavigalugit maanna pisortaanerusimasup soraarsinneqarnissaa siulersuisut juulip ulluisa qulinganni aalajangerpaat, Lars Borris Pedersen oqarpoq.
Arnat arlallit pisortaanerusimasoq kanngutsaatsuliorsimasutut tamatuma kingorna unnerluutigaat. Pisut taakku KNI-mi atorfeqarnerisa nalaanni pipput.
Suliaq taanna decembarip aallartinnerani eqqartuussissutigineqassaaq.
