Unioqqutitsisumik piniartoqartarnerata ammasumik pissuseqarfiginissaa Geislerip piumasarigaa
Taamalu iliorsimaneq inatsisartunut ilaasortap isumaliornartoqartipaa.
- Pissusissamisoorsorinngilara tamakkua nipaatsumik suliarineqartassappata aalajangiiffigineqarlutillu. Nalunngikkaluarlutigu immaqa maleruagassat tamakkiisumik malinneqanngitsut, Sofia Geisler KNR-imut taama oqarpoq.
Naalakkersuisut decembarip arfernganni 2018-imi Qimusseriarsuarmi qilalukkanik qernertanik 20-nik pisassiipput, aamma taama amerlatigisut Qeqertarsuup Tunuani pisassiillutik.
Taakkualu Qimusseriarsuarmut siorna 2018-imi pisassiissutaareersunut 70-iusunut aamma Qeqertarsuup Tunuani 85-iusunut ilassutaapput.
Unioqqutitsilluni piniartoqartarsimanera ilisimaneqartoq
Kisianni unioqqutitisilluni piniartoqarsimanera Naalakkersuisunit ilisimagaluarlugu pisasseeqqipput.
Tassami Inatsisartut piniarnermut ataatsimiititaliaat piniarnermut Naalakkersuisoq novembarip 25-iani 2018 siunersiorneqarnissamut aggersarmagu, ataatsimiititaliaq ilisimatinneqarpoq, Naalakkersuisoqarfik sumiiffinni assigiinngitsuniit unioqqutitsilluni piniarnermik pasilliinermut nalunaarutinik arlalinnik tigusaqartoq.
- Taava minnerpaamik piumasarisariaqarparput aqunneqarnerinut, imaluunniit inatsisinik atuutsitsineq aammalu malitseqartitsineq qanoq ittoq ingerlanersoq ammasumik pissuseqarluni aqunneqarnissaa, Sofia Geisler oqarpoq.
KNR-ip aalisarnermut piniarnermullu naalakkersuisoq oqaaseqartinniaraluaramik iluatsinngilaa.