Unioqqutitsilluni qernertanik qilalugartoqarsimaneranut: Ikippallaanik pisassiisoqartarmat piniartut unioqqutitsisarput

Qernertanik ikippallaanik qilalugartassiisoqartarmat inatsisinik unioqqutitsilluni piniartoqartarneranik kinguneqarpoq.

Kalaallit Nunaanni Nunaqarfiit Peqatigiiffiat, KANUNUPE aamma Kalaallit Nunaanni Aalisartut Piniartullu Peqatigiiffiat, KNAPK, inuit qulingiluat unioqqutitsillutik Kullorsuarmi qernertanik qilalugarsimasutut sapaatit akunnerata siuliani pasisaareerneranni taama oqarput.

Pasisat qulingiluat taakku qernertanik 20-t missaanniittunik septembarimi qilalugarsimasut, politiit oqarput. Pasisat qernertanik qilalugartassat juunimi tamakkerneqareeraluartut taamaaliorsimapput.

Qernertanilli qilalugartassat ikippallaarnerat nunaqarfinni piniartunut kipiluttunarpoq. Qilalukkammi qernertat ilaatigut qaleralinniarnermi akornutigigaat, KANUNUPE-p siulittaasua Karl Petersen oqarpoq.

- Taamannak piniartut ulluni makkunani qaleralinniarnermi akornutigitigigaat naalakkersuisoqarfiup taamatut qilalukkanik killilersukkanik ikippallaanik pisassiisarnerata kingunerivaa piniartut neqissaq eqqarsaatigalugu paggataasaannarlutik piniartarnerat, ilaatigullu aamma unioqqutitsillutik piniartartut tusartarparput, taanna oqarpoq.

Taamaammat ataasiinnarmik aaqqiissutissaqartoq, Karl Petersen isumaqarpoq.

- Unioqqutitsilluni piniartarneq pinngitsoortinneqarsinnaavoq pisassat aatsaat amerlineqarpata, taanna oqarpoq.

Qernertanik qilalugartassiisarneq oqallisigeqqittariaqartoq, aamma KNAPK isumaqarpoq. Taamaaliortoqartarnera uggorigini aammali paasisinnaagini, KNAPK-p siulittaasua Nikkulaat Jeremiassen oqarpoq.

- Inuussutissaqarusullutik taamaaliortarnerat uggornarpoq. Isumaqarpungali paasineqarsinnaasariaqartoq uanga illillu aningaasarsiorfeqarluta inuuniarpugut, kisianni taakku toqqaannaq aningaasarsiorfeqanngillat. Pisaqanngikkunik inuussutissaminnik pissarsisinnaanngittut aamma tupinnartuliaanngilaq taamaaliorneq.

Taamaammat pisassat amerlanerusariaqartut, taanna isumaqarpoq.

- Namminneerlutik pisassanik noqqaasarput, tamatigullu akuerineqarneq ajorput. Taakkua aallaavigilluinnarneqartariaqarput. Tusaaneqartariaqartunukua inuuniarnermikkut atugaat eqqarsaatigalugit, Nikkulaat Jeremiassen oqarpoq.

Unioqqutitsillutik qernertanik qilalugarsimasutut pasisat qulingiluat akiliisinneqarataannaapput, aamma piniarnermut allagartaat, piniutaat pisaminnillu ilunaarutaat arsaarinnissutigineqarataannaapput. Politiit qilalukkap qernertap mattaanik 40 kiilut missaanniittumik arsaarinnissuteqareerput.

Unioqqutitsinerit qernertanik qilalugaqassutsimut akornutaasut

Qernertanik ikippallaanik qilalugassiisoqartarnera piniartunut kipiluttunaraluarpalluunniit unioqqutitsilluni piniarneq isumatusaarnerunngilaq. Taamaaliortarnermi maanna pisassiisutaasutulli amerlatigisunik qilalugarsinnaajunnaarnerannik kinguneqariaannaavoq. Pinngortitaleriffiup miluumasunut timmissanullu immikkoortoqarfiani ilisimatooq Mads Peter Heide-Jørgensen taama oqarpoq.

- Qilalugartassiissutit, siunnersuutit malikkaanni, siunissami qernertanik qilalugarniartoqarsinnaaqqullugu siunnersuutaapput. Taamaammat pisassiissuissatut siunnersuutinit amerlanerusunik pisaqartoqaraangat qilalugaqassutsimut akornutaasinnaavoq, taanna oqarpoq.

Taamaaliortoqartaneralu tassa Kullorsuarmi Upernavimmilu ajornartorsiutaaqisoq, professori oqarpoq.

- Ingammik Qimusseriarsuarmi ajornartorsiutaavoq, biologimmi Upernavimmi pisassatut siunnersuutaanit 24-usuninngarnit amerlaneroqisunik tamaani pisassiisoqartarpoq. Tamaanimi pisassat tallimariaammik amerlanerupput, Kullorsuarmi pisassaninngarnit 20-t missaannik amerlanerusunik qernertanik qilalugartoqarsimanera qilalugaqassutsimut akornutaasinnaavoq.

Taamaammat qernertanik qilalugartassiinerusoqarpat, tamanna pinngortitamut qilalugaqassutsimullu akornutaassasoq, Mads Peter Heide-Jørgensen oqarpoq.

- Biologit pisassatut siunnersuutaat isumaqatiginngikkaluaraanniluunniit taamaaliortoqartarnerata qilalugaqassutsimmut akornutaarujussuarsinnaanera miserratissaanngilaq. Pisassatut siunnersuutit sinnerlugit pisaqartoqaannartarnera mianersuaalliornerujussuuvoq.

Kullorsuarmi aalisartut piniartullu peqatigiiffianneersumik oqaloqateqarniaraluarpugut, tassanngali oqaaseqartoqarumanani.