Uumasorsiuut siunnersuutaasa akerliannik tunumi qaqortanik pisassiisoqartoq

Tunumi piniartut Kuummiit kangerluani qilalukkanik qaqortanik decembarip arfineq aappaani pisaqarsinnaanatik isiginnaaginnartut, nutaarsiassiaraagut.

Maannali tunumi Tasiilap eqqaani piniartut qilalukkanik qaqortanik pisassinneqarput.

Pisassiissutit aalisarnermut piniarnermullu naalakkersuisoqarfimmiit tallimanngormat nalunaartigineqarput.

Qilalukkat qaqortat 30-t Tasiilami Ittoqqortoormiinilu maannakkumiit 2027-p tungaanut pisassiissutigineqarput.

Qilalukkat qaqortat piniagaaqqilersut

Tassa imaappoq Ittoqqortoormiini Tasiilamilu qilalukkat qaqortat ukiut tallimat taakku iluanni 30-t pisarineqarpata pisassat nungussapput.

Qilalukkalli qaqortat takkuttuaannanngikkaluarlutik piffissap ilaani takkusimaartarmata taama pisassiisoqartoq, aalisarnermut piniarnermullu naalakkersuisoqarfimmiit ilisimatitsipput.

Qilalukkat qaqortat tunumi ikippallaarmata 1960-ikkunnili eqqissisimatitaalerput.

Maannali piniaqqusaaqqilernerat Kuummiini piniartumit, Anders Sanimuinamit nuannaarutigineqaqaaq.

- Piniartuulluni nuannaarnarpoq, aamma arfininngormat angallassillunga ingerlaarninni piniartoqatikka qilalukkanik qaqortanik kangerlutsinni takoqqittut tusaavakka, Anders Sanimuinaq oqarpoq.

- Neriuutigeqaara juullinngilaataa takoqqissalluta. Tassa takkuteqqiinnariannguarlik pisassinneqarpugut, nuanneq.

AAMMA ATUARUK Kuummiini piniartoq soriarsinnaanngitsoq: Qilalukkat isiginnaaginnartariaqarpakka

Taannami decembari aallartereersoq qilalukkat qaqortat arlalissuit Kuummiit kangerluanut pulararmata pisaqarusukkaluaqaluni isiginnaaginnarnikuuvoq.

- Soorunami piniartutut tikeriaannaagaluarlugit, pisareriaannaagaluarlugit, aamma ilaquttakka eqqarsaatigalugit, juullilerneralu ilungersunarpoq neqissaqarniarneq aamma mattaat eqqarsaatigalugit pisarerusunnaraluarput uangaalluni. Aamma kiffaanngissuseqaraluaruma, inatsisit eqqarsaatigalugit piniaqqusaagaluarpata qangaaniilli ileqqoq malillugu pisaqassagaluarpugunaasiit naammagisatsinnik.

Uumasorsiuut innersuussinngitsut

Tunumi qilalukkanik qaqortanik pisassiisoqarnissaanik Pinngortitaleriffimmiit uumasorsiuut innersuussuteqanngillat. Taamaattorli Naalakkersuisut pisassiiniarlutik aalajangerput.

Inatsisartuni, Naleqqameersoq, Jens NapãtôK´, Siumullu Inatsisartuni gruppianniit Tunumi qilalukkanik qaqortanik pisassiisoqarnissaanik ukioq manna ukiaanerani Inatsisartut ataatsimiinneranni kaammattuuteqarput.

Taakkulu siunnersuutit marluk aallaavigalugit pisassiisoqarpoq.

Qilalukkat qaqortat 500-t missaanniittut

 tunumi siumorneqartut Norgemi Svalbardimeersuusut, Pinngortitaleriffimmeersup, Fernando Ugartep KNR-imut oqaatigaa.

Qilalukkanik qaqortanik pisassiinerup qilalugaqassutsimut sunniutissai pillugit, oqaaseqarsinnaannginnerarpoq.

- Uumasorsiuut innersuussutiginngisaanik maanna tunumi qilalukkanik qaqortanik pisaqartoqarsinnaalerpoq. Taamaammat pisassiineq taanna piujuartitsisinnaanersoq naluara, taanna oqarpoq.

Taassumali oqarnera naapertorlugu, qilalukkanik qernertanik qaqortanillu pisassiineq annertuallaaqaaq.

- Tunumi qilalukkanik qaqortanik qernertanillu pisassiineq annertuallaarpoq. Qilalugaqassuseq aallaavigalugu pisassat amerlavallaaqaat, Fernando Ugarteq oqarpoq.

Tunumili piniartut qilalukkat qaqortat takusatik amerlaqimmata pisassanik qinnuteqarlutik, taakku KNR-iut oqaluttuarput.