Kuummiini piniartoq soriarsinnaanngitsoq: Qilalukkat isiginnaaginnartariaqarpakka

Tunumi piniartut arlaqartut piniagassat pilernguttaqisatik umiatsiaminiit sunagit pingasunngormat isiginnaaginnarpaat.

Qilalukkammi qaqortat tunumi nunaqarfiup Kuummiit eqqaani kangerlummi piniartunit siumorneqarput. Qilalukkalli qaqortat tunumi pisarineqaqqusaanngillat.

59-inik ukiulik Anders Sanimuinaq, ukiuni 50-inngulersuni aalisartuullunilu piniartuuvoq, qilalukkanillu pisaqarsinnaanani isiginnaaginnarnini ipianngugeqaa.

- Soorunalimi siuaakka piniartut eqqaavakka, taakkummi piniartutut kiffaanngissuseqarlutik piniartagarinikuummassuk.

AAMMA ATUARUK Qilalugaq qaqortaq tunumi nakkutigineqarsimavoq

- Uagut isiginnaaginnarluta piniarniarsarinagit, naak piniagarisarlugit, inatsisilli malikkatsigit pisareqqusaanngilagut, assut eqqarsarnaqaaq, umiatsiat arlariiuvugut, Kuummiit kangerluani qaqortat isiginnaakkagut amerlaqaat, isiginnaaginnartariaqarluni ajuusaarnaraluaqaaq, piniartoq Anders Sanimuinaq oqarpoq.

Tunumi qilalukkat qaqortat piniarneqaqqusaanngillat, taamaallaalli qilalukkanik qernertarniartoqarsinnaalluni. Juullilli qaammataani qilalukkanik isiginnaaginnarluni eqqarsaatit, Anders Sanimuinarmut itipput.

- Soorunami piniartutut tikeriaannaagaluarlugit, pisareriaannaagaluarlugit, aamma ilaquttakka eqqarsaatigalugit, juullilerneralu ilungersunarpoq neqissaqarniarneq aamma mattaat eqqarsaatigalugit pisarerusunnaraluarput uangaalluni. Aamma kiffaanngissuseqaraluaruma, inatsisit eqqarsaatigalugit piniaqqusaagaluarpata qangaaniilli ileqqoq malillugu pisaqassagaluarpugunaasiit naammagisatsinnik.

Qaqortat tunumi piniagaanngillat

Qilalukkanik qaqortanik tunumi pisassaqanngilaq, tamanna akuttuallaamik qilalukkanik qaqortanik tikinneqartarnera peqqutaarsoq, Naalakkersuisut tunngavilersuutigaat.

Tunumi qilalukkanik qaqortanik qaqutigorsuaannaq qangaanerusoq saaqquttoqartarpoq.

Qaqortalli takuneqartartut ukiuni kingulliunerusuni akulikinnerulersimasut, Pinngortitaleriffiup nittartagaani atuarneqarsinnaavoq.

Tamannalumi Kuummiini piniartumit aamma ilalerneqarpoq.

- Ukiunik kingullernik qulinik kingumut qiviassaguma, taamanili qilalukkat qaqortat piniariarfitsinnut saaqquttalerneri maluginiarnikuuakka.

- Siorna upernaakkut aamma saaqqutillarmata pisaqarnikuugaluarpugut, eqqissisimatitaammatalli pisagut tamarmik arsaarinnissutaanikkuupput, taamaammat tamanna nalaateqqinniarnagu massakkut pisariniarsarinagit isiginnaaginnarpagut, Anders Sanimuinaq oqarpoq.

Kuummiit kangerluani qilalukkat qaqortat 500-t missaannittut isiginnaarneqartut, Anders Sanimiuinaq oqaluttuarpoq. Piniartut arlaqartut qilalukkanik qaqortanik videoliorput, immiussatillu Pinngortitaleriffimmut nassiullugit. Pinngortitaleriffiulli KNR-imut oqarnerat naapertorlugu immiunneqarsimasuni qilalukkat qaqortat 500-t missaanneernersut uppernarsarsinnaanngilaat.

Pinngortitaleriffik pisassanik naalakkersuisoqarfimmut siunnersuuteqartarpoq.

Qinnuteqaammik tunniussisut

Piniartulli qilalukkat qaqortat takusatik amerlammata maanna pisassinneqarnissaminnik qinnuteqarlutik KNR-imut oqarput.

- Uanga piniartuullungalu aalisartuuvunga, aamma Kuummiini aalisartut piniartullu kattuffianni siulittaasuuvunga, taamaammat kattuffik sinnerlugu pisassanik tunineqaqqinnissatsinnut qinnuteqaammik nassiusseqataavunga, Anders Sanimuinaq oqarpoq.

Tamanna pillugu aalisarnermut piniarnermullu naalakkersuisoq, qinnuteqaatinut qanoq iliuuseqarniarnersoq pillugu paasiniarlugu KNR-imiit attaveqarfigaarput.

Taassumali allattaata oqarnera naapertorlugu naalakkersuisoq qinnuteqaatinik suli tigusaqarsimannginnerarpoq.

Qinnuteqaatilli KNAPK-mut Siumullu sinnerlugu inatsisartunut ilaasortamut Lars Poulsenimut tunniunneqartut, tunumi piniartut kattuffianni siulittaasoq oqarpoq.

Qinnuteqaat aalisarnermut, piniarnermut nunalerinermullu ataatsimiitiliamut ingerlateqqinneqartoq, Lars Poulsen KNR-imit oqaloqatigineqarami oqarpoq.

Ataatsimiititaliamiilli ataatsimiissutigineqareerpata aatsaat naalakkersuisumut ingerlateqqinneqassasut, aalisarnermut, piniarnermut nunalerinermullu ataatsimiititaliami siulittaasoq, Hans Aronsen oqarpoq.

Piniarneq pillugu Siunnersuisoqatigiit (PPS) tunumi qilalukkat qaqortat akuttusuumik takkusimaartillugit pisarineqarsinnaanngornissaannik kissaateqarput. Taamaattumik tunumi qilalukkanik qaqortanik Naalakkersuisut pisassiinissaat kajumissaarutigineqartoq, naalakkersuisut nittartagaani allaqqavoq.