Ungarn EU-p Ukrainemut ikiorsiiniarneranut akornuseeriaraluartoq

Ungarn EU-p Ukrainemik aningaasatigut ikiorsiiniarnermi manngertitaarpoq.

Ukrainep 18 milliardit euronik, tassa 134 milliardit koruunit missaannik ikiorserneqarnissaanik siunnersuut Ungarnip marlunngornermi taasinermi itigartippaa. Ukraine maanna ikiorneqassappat, taava EU-Kommissioni allatut iliuuseqartariaqalerpoq.

Hollandip aningaasaqarnermut ministeria, Sigrid Kaag, taama oqarpoq. EU-mi nunat aningaasaqarnermut ministeriisa ataatsimeereerneranni oqaloqatigineqarpoq.

- EU-p tutsuiginassusaa aalajangiiffigisavut aallaavigalugit nalilersorneqartarpoq. Taamaammat Ukrainemut inuinullu ikiorsiiniarneq allaqqunneqarsinnaanngilaq, Sigrid Kaag oqarpoq.

AAMMA ATUARUK EU-p Ruslandimit uuliamik eqqussuineq ukioq manna naatinnagu inerteqqugilerniaraa

EU-p Ungarnimik ikiorsiisarneranut tunngatillugu isumaqatigiinniarnerit naammassiartulersullu Ungarnip Ukrainemik ikiorsiiniannginnera saqqummerpoq.

EU-mi nunat Ungarnimut ikiorsiiniarnerlutik ikiorsiiniannginnerlutilluunniit kingusinnerpaamik decembarip ulluisa 19-ianni aalajangertussaavaat.

Ungarn aningaasanik EU-mit ikiorserneqassappat, aningaasarsiornikkut aaqqissuusseqqittariaqassaaq. Ungarnili naammattumik aaqqissuusseqqinngitsoq, EU-Kommissionip nalilerpaa.

AAMMA ATUARUK Nunani EU-mi ilaasortani qulini coronap tuniluunnera ernummatigineqartorujussuuvoq

Ungarn naalagaaffinni inatsisit tunngavigalugit naalakkersuinermik malinninnginnera EU-Kommissionimit isornartorsiorneqarpoq. Aamma Ungarnimi aningaasatigut peqquserluttuliortoqartarnera, EU-p pifffissami sivitsortumi aamma isornartorsiorpaa.

Ungarn pillugu EU-p oqaluttuarisaaneranut tunngassuteqarpoq, nunat EU-mut ilaasortat arlaannaalluunniit siornatigut taama pillarneqarnikuunngammat.

Aningaasat 7,5 milliardit euronik naleqartut koruuninngorlugit 56 milliardiusut mattunneqassasut, EU kommissioni septemberimi aalajangerpoq, aningaasallu taakku suli atorneqarsinnaannginnissaat EU kommissionip suli kissaatigaa.