Uummannami Upernavimmilu oqarasuaatit, internetti, raadio tv-lu ajutooqqittut

Attaveqaatit ajutooqqipput.

Oqarasuaatinut, internettimut, radiomut tv-mullu attaviit nunatta avannaani - Uummannami nunaqarfiinilu aamma Upernavimmi nunaqarfiinilu ajutooqqipput.

Allatut oqaatigalugu: Angerlarsimaffimmi oqarasuaatit qaammataasatigullu attaviit kisimik attaveqarput. Angerlarsimaffimmilu oqarasuaatit illoqarfinni nunaqarfinnilu kisimik atorneqarsinnaapput. Tassa imaappoq illoqarfimmiit nunaqarfinnut imaluunnit illoqarfimmiit illoqarfimmut imaluunniit nunaqarfiit akornanni sianertoqarsinnaanngilaq.

Tusass naapertorlugu ajutooqqanera sumiissusersineqareerpoq - tamannali silap ajornera pissutigalugu suli iluarsaanneqarani.

AAMMA ATUARUK Mobilinut internetsikkullu attaveqaatit Uummannami atassutaarupput

Siullermik sapaatiummat unnukkut attaveqaatit ajutoorput. Ippassaq nalunaaqutaq ualikkut marluk missaanni attaveqaleqqipput, attaviilli ataasinngornerup unnukkuani nalunaaqutaq 01.30 ajutooqqillutik, Tusass paasissutissiivoq.

Teknikerit angalallutik ajutoornermik aaqqiiartornissaminnut piareersimapput, silalli ajornera pissutigalugu qulimiguulik qangattarsinnaanani.

Taamaammat ajutoornerisa qaqugu aaqqinneqarsinnaanissaa ilisimaneqanngilaq.