Mobilinut internetsikkullu attaveqaatit Uummannami atassutaarupput
Unnuarli nalunaaqutaq ataatsinut qiteqquttoq Upernavimmi Tusass atassutaaruppoq, taamaattumillu Upernavimmut Upernavimmiillu atassuteqarniarneq maanna killeqartoq, aammalu illoqarfimmi TV- radiolu atassuteqanngitsut, Tusass nalunaarpoq.
Tusass allappoq, ajoqutaasoq paasineqartoq, silali pissutaalluni helekopteri teknikerinik aaqqiiartortussanik ingerlassisussaq ingerlassisinnaanngimmat maannakkuugallartoq attaveqaatit iluarsineqarsinnaanngikkallarput.
- Sulisut akunnerpassuarni ilungersorput, silali pissutigalugu teknikerit taavunga aallarsinnaanngillat, Tusassimi attaveqaqatiginnermut pisortaq Julie Rademacher KNR-mut oqarpoq.
Kalaallit Nunaata politiivisa Uummannami Upernavimmilu attavilunneq eqqumaffiginerarpaat. Politiini pigaartoq Brian Thomsen KNR-mut oqarpoq, illoqarfinni pineqartuniit politiinut attaveqarnissaq pisariaqartinneqaleriataassappat satellit-telefoni atorneqarsinnaasoq. Taama ittumilli peqartoqanngippat illoqarfimmi politiit attavigineqassapput.
Uummannaq aamma Upernavik eqqugaapput
Tusass ilimatitsivoq Uummannami nunaqarfiinilu nalinginnaasumik telefoneqarneq atorsinnaagaluarluni, illoqarfiilli akornanni aammalu nunaqarfiit akornanni atorsinnaanngitsoq.
Taamatullu aamma TV- radiolu Uummannami atassutaarupput.
Tassalu imaappoq Uummannamut Uummannamiillu mobilinut internetsimullu attaviit atorsinnaanngillat.
Erseqqissaatigineqarporlu Upernavimmi mobiilit internetsikkullu attaveqaatit sakkukimmata datallu atorneqarsinnaasut arriitsuararsuusut killeqaqisullu.
Upernavimmili nunaqarfiinilu fastnettelefoni atorsinnaavoq.