Umimmak aarlerinanngilaq

- Isumaqarpunga umimmaat ikilisimanissaat ernumassutigineqartariaqanngitsoq, Pinngortitaleriffimmi umimmaat tuttullu pillugit suliaqartartoq, Christine Cuyler oqarpoq.

Umimmaat Kangerlussuarmiittut piniarneqartanngikkallaramik mittarfiup eqqaani takussaasorujussuusut,maannali takussaavallaarunnaaraluarlutik nunap timaanut ingerlanerulersimasut, Christine Cuyler oqaluttuarpoq.

Uumasut silatuut

Piniartut, takornarianik sullissisut piniarnermullu nakkutilliisoq umimmaat Kangerlussuup Qinnguani takussaavallaarunnaarsimasut siornatigut aamma oqarput.

Tamassumunngali suna pissutaaneranut isummat assigiinngillat.

Umimmaat piniarneqarpallaartut, inuillu piniarfinni qamutinik motoorilinnik angalasarnerat ilaatigut tikkuarneqarput.

Umimmaalli takussaavallaarunnaarnerannut pissutsit arlaqarsinnaasut, inuillu umimmaqarfinni pissusilersornerat umimmannik qimaatitsisoq, Christine Cuyler nassuiaavoq.

- Qimaasartut takuneqarsinnaavoq. Tassami sianiinngillat. Piniartut qamutinik motoorilinnik aggerpata, aallaaneqarnissaminnut uninngaannarlutik utaqqiinnarnavianngillat. Inunnit ingerlaffigineqarneq ajortumut qimaagunik tupinnanngilaq, Christine Cuyler oqarpoq.

Aamma atuaruk Umimmanniapiluttoqartarneranut allannguisoqassamaarpoq

Umimmaat Kangerlusuup Qinnguaniittut 2012-imi kingullermik misissorneqarput.

Taamaammat ilisimatusarnikkut misissuinermik nutaamik tunuliaqutaqarani, Christine Cuyler nassuiaavoq.

Nutaamik misissuiniarsarivoq

Misissuinissarli nutaaq maanna sulissutigineqartoq, ilisimatusartoq oqarpoq. Ukioq mannali kisitsisoqarnissaa ilimananngilaq.

- Umimmaat amerlassusaat pillugit ilisimasanik nutaanik pissaagut. Tamanna aalisarnermut, piniarnermut nunalerinermullu naalakkersuisoqarfimmit siunnersuisinnaaniassagama piumasarineqarpoq. Suliaq aallartereerpara, qinnuteqaammillu nassiussereerlunga. Ukiormannamulli akuersissummik pinngilanga, Christine Cuyler oqarpoq.

Aamma atuaruk Umimmaat takussaajunnaarneranut isummat assigiinngillat