Umimmaat qimaannakkat: Politiit suli takunnissimasussarsiorput
Kalaallit Nunaanni politiit Upernaviup eqqaani sumiiffinni assigiinngitsuni marlunni umimmaat 30-t toqungasut nassaarineqarnerannik aggustip qulingani nalunaaruteqarfigineqarput.
Umimmaat aallaneqarsimapput neqaanillu tigusiffigineqarsimanatik qimaannarneqarsimallutik.
AAMMA ATUARUK Ilisimannittussarsiortut: Umimmaat 30-t aallaaneqarlutillu qimaannarneqartut
Umimmaalli Milloorfimmi Amitsumilu toqungasut 30-t pillugit paasiniaanermi atorneqarsinnaasunik amigaateqartoqarpoq. Taamaammat politiit suli takunnissimasussarsiorput.
Taama Ilulissani politiit tusagassiuutinut nalunaaruteqarput.
AAMMA ATUARUK Politiit umimmaat toqungasut pillugit suliami unnerluutiginnittut
Politiilli suliami misissuinerminni unioqqutitsisoqarsimaneranik ataatsimik allamik paasisaqarput. Inuk ataaseq tassunga atatillugu Upernaviup kujataani Arfertuarsummi umimmannik arfinilinnik inatsisinik unioqqutitsinikkut piniarsimasutut pasineqarluni unnerluutigineqarpoq.
Tamatumalu saniatigut paasiniaajartortut umimmannik toquinnakkanik allanik aamma siumuisimapput.
Inuit Milloorfimmi Amitsumilu umimmannik qimaannakkanik nassaarfiusumut atatillugu paasissutissaateqartut Kalaallit Nunaanni Politiinut attaveqaqquneqarput. Kalaallit Nunaanni Politiit oqarasuaataasa normoraat 70 14 48.
