Umiarsuit marluk Nordsømi aportut: Inuit arlallit maqaasineqarput

Umiarsuit pajuttaatit marluk Nordsømi apormata inuit arlallit maqaasineqarput. Tysklandimi oqartussat taama oqartut nutaarsiassaqartitsiviup AFP-p allaaseraa.
Tyskit umiarsuaat annaassiniartartut umiarsuaat "Herman Marwede", umiarsuit pajuttaatit marluk Nordsømi qeqertat ilaata Helgolandip ungasinngisaani apormata annaassiniaqataavoq. Inuit arlallit maqaasineqartutut nalunaarutigineqarput. Assi © : Helmut Hofer/Ritzau Scanpix
Allattoq Mads Lynge
oktobarip 24-at 2023 06:07

Umiarsuit pajuttaatit marluk, Tuluit Nunaanneersoq ataaseq, Spaniameersorlu, Nordsømi apormata inuit arlallit maqaasineqarput. Tysklandimi oqartussat taama nalunaaruteqarput.

Umiarsuit marluk qeqertat Helgolandip Langeoogillu akornanni aporput. Helgolandimit kimmut kujammukanneq 22 kilometeritut ungasitsigisumi aporput.

Annaassiniartoqaleruttortoq, Tysklandimi imarsiornermi annaassiniartartut nalunaarutigaat.

Umiarsuaq Tuluit Nunaanneersoq umiarsuarlu Spaniameersoq aporput. Tuluit umiarsuaat 91 meteritut takitigaaq, Spaniamiullu umiarsuaat 190 meteritut takitigaluni.

Spaniamiut umiarsuaat 22-nik inuttaqarpoq, sulilu Nordsømiilluni. Nutaarsiassaqartitsivik Reuters taama allappoq, tuluillu umiarsuaat apornermi kivisoq oqaatigineqarluni.

Inuk ataaseq annaanneqarsinnaasimavoq, arlallilli allat maqaasineqarlutik.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk

Aliasuuteqartunut Qaqortumi peqatigiiffik nutaaq misigissutsinik suliarinninnissamut sakkussaqalersitsissasoq

Nuummi ujaasineq iluatsilluartoq

Angut Nuummi Blok 5-imi toqungasoq quimi nassaarineqartoq