Umiarsuarnik takornariartaatileqatigiiffissuaq akiliisitaarujussuartoq
Tuluit aviisiat The Guardian taama allaaserisaqarpoq.
Umiarsuaatileqatigiiffiup Carnivalip umiarsuarnik takornariartaatinik 100-nit amerlanerusunik pigisaqartup, unnerluussutaasut tamaasa nassuerutigalugit 280 millionit koruuninik akiligassinneqarnini akueraa.
Suliani taama ittuni akiligassiinerit anginersaraat.
Umiarsuaatileqatigiiffiup umiarsuaataasa ilaat aamma Nunatsinniissimavoq. Umiarsuaatileqatigiiffiup Carnivalip umiarsuaataa Carnival Legend takornarianik 2000-inik ilaasoqarluni 2013-imi Qaqortumiippoq.
Aamma atuaruk Umiarsuaq takornariartaat Qaqortumut ullumi tikissaaq
Unnerluussisussaatitaasut naapertorlugit umiarsuaatileqatigiiffiup eqqartuussivimmut suliassanngortinneqarnera aallartippoq ingeniørip umiarsuarmi Caribbean Princessimi "ruujorimik angakkuakkamik" taasaminik nassaarnerata nalunaarutiginninneratalu kingorna.
Kingornalu paasiniaaffigineqarmat Caribbean Princessip imermik uuliamik mingutsinneqarsimasumik ruujori pineqartoq atorlugu ukiorpassuarni imaanut kuutsitsisarsimanera paasineqarpoq.
Tamatumunnga peqatigitillugu umiarsuit motooriisa uuliartaannik imaanut kuutsitsinnginnissaq qulakkeerniarlugu malussaatit atorneqartut umiarsuit inuttaasa allanngortitertarsimagaat aamma paasineqarpoq.
Malittarisassat naapertorlugit imeq uuliamik mingutsinneqarsimasoq katersorneqartussaavoq, avatangiisillu innarlerneqaqqunagit salinneqartussanngorlugu umiarsualivinnermi umiarsuarmit niuneqartussaalluni.