Umiarsuaq takornariartaat Qaqortumut ullumi tikissaaq

Umiarsuup takornariartaatip Carnival Legendsip Qaqortumut ullumi tikinnissanut atatillugu niuernermik ilinniarfik umiarsuit takornariartaatit angisuut tikikkaangata qanoq pitsaanerusumik kiffartuussisoqarsinnaaneranik ilinniarfiusussanik assigiinngitsunik sammisaqartitsiniarpoq.
oktobarip 04-at 2013 06:36

Carnival Legend takornarianik 2000-inik ilaasoqarluni Qaqortumut ullumi tikissaaq. Tassunga atatillugu illoqarfimmi tamanut ammasumik aaqqissuussisoqassaaq, ilaatigut qilaatersortoqassaaq, erinarsoqatigiit kalaallisoorlutik erinarsussapput, angerlarsimaffinni kalaaliminernik ussiititsisoqassalluni, kiisalu aamma ammerivik Great Greenland pillugu oqalugiartoqarluni kingornalu suliffeqarfimmi atisanik takutitsisoqassaaq uaajeetoqarlunilu.

Niuernermik Ilinniarfimmi Serviceøkonominngorniat Greenland Sagalandmi sulisut suileqatigalugit ulloq takornarianut puigunaatsunngortinniarpaat.

Ilinniartut atisanik takutitsineq isumagissavaat, atuaqatigiillu sinneri illoqarfimmut siammarlutik aqqutissanik ilitsersuissapput oqaluttaallutillu.

Serviceøkonominngorniat ilaat - Sørine Petersen - atisanik takutitsinerup nalaani uaajeerniarpoq. Atisanik takutitsisut aamma Duuden Designip atisanik takutitsinermut tunissutaanik iverusersorsimassapput.

Greenland Sagalandip pisortaa Pitsi Høegh umiarsuit takornariartaatit angisuut tikinnerini qanoq iliortoqartarneranik Narsamiunik Nanortalimmiunillu ulluni makkunani aamma pikkorissaavoq.

Pikkorissartut ilitsersuisutik peqatigalugit aamma Carnival Legendimut pulaartinneqassapput.