Iranimi qanganitsanik pingaartitsilluinnartoq qinersinermi ajugaassangatinneqartoq

Iranip anersaakkut siulersortaata Ali Khameneip qinersisartut qinersiartornissaat, TV-kkut aallakaatinneqartukkut sakkortuumik kaammattuutigaa.

Khameneip tapersersugaasa ilaata, 60-inik ukiullip Ebrahim Raisip, præsidentitut qinigaanissaa ilamanarluinnarpoq. Raisi Iranimi eqqartuussisuni qullersaavoq qanganitsanillu pingaartitsilluinnartuulluni.Præsidentimut ingasattajaartuunngitsumit Hassan Rouhanimit qanganitsanik pingaartitsilluinnartumut saattoqarnissaa tassa ilimanarluinnarpoq. Rouhani Iranip atomip nukinganik atuisinnaanissaa pillugu nunat pissaanilissuit peqatigialugit 2015-imi isumaqatigiissusioqataasuuvoq.

AAMMA ATUARUK Aallartitat: Iranimut atomimik isumaqatigiissut inissikkiartorpoq

Præsidentimut qinersinermi sassartut pingasunngorneq ilanngullugu katillugit arfineq-marluugaluarput, pingasulli piffissaq kingulleq atorlugu tunuaannarlutik.

Qinersiartortut ikittuinnaanissaat naatsorsuutigineqarpoq. Qinersisartut 41 procentit qinersiartorumaartut, inunnik isumasiuinerup takutippaa. Iranimut tunngatillugu tamanna appasittorujussuuvoq, Iranillu aqutsisuisa inatsisitigut akuerineqarsinnaassusiannik tamanna innarliilluni.

Iranimi præsidentimut 2017-imi qinersisoqarmat, qinersisartut 70 procentii qinersiartorput.