Ullumikkut qinersisoqartuuppat ima inerneqassagaluarpoq
Sermitsiami ullumi saqqummersumi tamanna atuarneqarsinnaavoq.
Siumut 2014-imi qinersinermi 34,7 procentinit taaguunneqarpoq, ullumikkullu qinersisoqartuugaluarpat 37,7 procentinit taaguunneqassagaluarluni. Partiip Inatsisartuni ilaasortaatitai maanna aqqaniliusut aqqaneq-marlunngussagaluarput.
Partiilli naalakkersuisuutitaqartut Siumut, Atassut Demokraatillu Inatsisartuni ilaasortaatitaat ataatsimut isigalugu ataatsimik ilanngassagaluarput, tassami Atassut marlunnik ilaasortaatitaqariarluni ataasiinnanngussagaluarmat, Demokraatillu maanna sisamaasut pingasuinnanngussagaluarmata.
Inuit Ataqatigiit siuarialaaraluarlutik ilaasortaatitaasa amerlassusaat allanngussanngikkaluarpoq, aqqaniliuinnaassagaluarmata, partii Nalerarlu ataatsimik ilalluni sisamanik ilaasortaatitaqalissagaluarami.
HS Analyse Sermitsiaq suleqatigalugu inunnik isumasiuisimavoq, inunnik 18-ileereersunik nalaatsornerinnakkut makinneqartunik oqarasuaatikkut ukioq manna maajimi juunimilu apersuisimalluni.
Inuit katillugit 708-t apersuinermi peqataapput.