Ullumi anaanat ulluat

Anaanarpassuit ullumikkut naasunik tunisissimassapput, tassami ullumi anaanat ulloraat. Tamanna malunnartinniarlugu ullumikkorpiaq anaanarpassuit Washingtonimi Det Hvide Husip silataani, tassa præsidentip illorsuata silataani akunnerni 24-ni Irakimi sorsunneq akerliuffiginiarlugu akerliussutimik takutitsipput.

Akerliussutsimik takutitsineq aallarnerneqarpoq sorsunnermik akerliusumit sorsunnermilu ernerminik annaasaqarsimasumit Cindy Sheehan-imit, anaananut akerliusunut aamma filmiliaritittartoq tusaamasaq Susan Sarandon peqataanerarpaat.

Anaanat ulluat taamani aallarnerneqaqqaarmat niuernerpalaarutaanissaanik isumaqartoqarsimanngilluinnaraluarpoq. Ullormillu taassuminnga isumassarsisuuvoq Amerikamiu atuakkiortoq Julia Ward Howe.

Taassuma 1870-imi anaanat ulluat naalakkersuisunut nalunaarutigeqqaaramiuk eqqissinissamik aamma siunertaqarsimavoq. Aatsaalli 1914-imi ullortut immikkut isigisassatut erfalasuliissutaalluni nalliuttorsiutissatut akuerineqarpoq. Taamanikkullu præsedentiusimasoq Woodrow Wilson tamatuminnga akuersisuuvoq.