Ulloq unnuarlu paaqqinnittarfiit sulisoqarnikkut meeqqanillu isumaginninnikkut ilungersuasut
Meeqqat inuusuttullu Namminersorlutik Oqartussat ulloq unnuarlu paaqqinnittarfiutaanni najugallit, namminersortut kommunillu ulloq unnuarlu paaqqinnittarfiutaanni najugalinnit atukkatigut ileqqutigullu ajornartorsiuteqarnerupput.
Namminersorlutik Oqartussat ulloq unnuarlu paaqqinnittarfiutaat tamanna ilutigalugu sulisoqarnikkut sulisoreriikkaminnillu perorsaasunik attassinnaarniarnikkut ilungersuapput.
Danmarkip inuunermi atukkanik ilisimatusarfiata misissueqqissaarisarfiatalu, tassa Det Nationale Forsknings- og Analysecenter for Velfærdip (VIVE), nunatsinni ulloq unnuarlu paaqqinnittarfiit pillugit qulaajaanermik nalunaarusiaani nutaajusumi isummiussat ilaat tamakkuupput.
AAMMA ATUARUK Ulloq unnuarlu angerlarsimaffiit inissaalatsinerat meeqqat sumiginnakkat amerlinerannik kinguneqartoq
Namminersorlutik Oqartussat ulloq unnuarlu paaqqinnittarfiutaat arlallit VIVE-mi misissuisuunerup Karen Margrethe Dahlip oqarnera naapertorlugu ikorfartuiffiulluarput, kisianni meeqqat artorsaaterpassuaqarnerat paaqqinnittarfinni sulisunut aamma ilungersunarluni.
- Meeqqanut ikiortarialiunerpaanut immikkut neqerooruteqartoqarniarnera ajunngilluinnarpoq. Tamannali sulinermi artukkiinermik malitseqartumik sullivinni aaqqiagiinngittoqarujussuarneranik aamma kinguneqarsinnaavoq, Karen Margrethe Dahl KNR-imut oqarpoq.
Naapertuuttumik periuseqarluni ikiorneqassasut
Meeqqat ikiortarialiunerpaat artorsaataat suunersut meeqqat ukioqatigiiaat soorlu aqqaneq-marluk 17-illu akornanni ukiullit qimerloornerisigut erseratarput. (Allaatigisaq assiliartat ataanni nangippoq.)
Iliuuseqarfigisassat imaaginnavipput, taamaammat sutigut iliuuseqalertortoqassanersoq imaaliallaannaq aalajangerneqarsinnaanngilaq, Karen Margrethe Dahl naliliivoq.
- Ikiuineq qaqugukkut naammaginartuusarnersoq oqaatigiuminaappoq. Meeqqalli assersuutigalugu atuariartunngitsuukulajunnaarnissaannut ikiorneqarsinnaappata ilinniakkamik naammassinninnissaannut periarfissaqarnerulersinnaapput.
- Naapertuuttumik periuseqarluni ikiorneqarpata artorsaaterpassuaqarnissaat ingalanneqarsinnaallunilu inuiaqatigiinnut sipaarutaasinnaavoq, Karen Margrethe Dahl oqarpoq.
Aalajaatsuutitsinissaq pingaarnerpaavoq
Meeqqat ikiortarialiunerpaat Namminersorlutik Oqartussat ulloq unnuarlu paaqqinnittarfiutaanni inissinneqakkajuttut, tamannalu paaqqinnittarfinni arlalinni sulisut ilungersuanerannik kinguneqartoq, VIVEP-p nalunaarusiaani erserpoq.
Nunatsinni meeqqat ukioqanngitsuniit 23-nik ukiullit ulloq unnuarlu paaqqinnittarfinni najugallit katillutik 325-t missaanniipput - taakkunannga 296-it ukioqanngitsuniit 17-inik ukioqarput.
Taakkunannga 171-it missaat Namminersorlutik Oqartussat ulloq unnuarlu paaqqinnittarfiutaanni najugaqartuupput.
Tusarfik: VIVE
Meeqqat paaqqutarineqarluarnissartik pisariaqarteqaat, tamannalu perorsaasut sulisoriinnarnissaannik ajornakusoortitsivoq. Taamaammat Namminersorlutik Oqartussat ulloq unnuarlu paaqqinnittarfiutaat arlallit soorlu perorsaasutut assigisaannilluunniit ilinniagalinnik sulisussarsiornikkut ilungersuasut, VIVE-p nalunaarusiaani allassimavoq.
Tamanna sulisussaaleqineq sulisut ilungersuanerulernerannik kinguneqartumik ajornartorsiutaajuaratarsinnaavoq.
Meeqqalli ikiortarialiunerpaanngitsut namminersortut kommunillu ulloq unnuarlu paaqqinnittarfiutaannut inissinneqartartut, nalunaarusiami aamma erserpoq.
Karen Margrethe Dahl ajornartorsiutit tamakku anigornissaannut iliuuserineqarsinnaasunik arlalinnik siunnersuuteqarpoq. Perorsaasut ulloq unnuarlu paaqqinnittarfinni sulinermi akissarsiaat qimerloorneqaqqaarsinnaapput. Perorsaasutut ilinniagaq aappaattut pitsanngorsarneqarsinnaavoq.
AAMMA ATUARUK Naalakkersuisoq ulloq unnuarlu angerlarsimaffiit pillugit: Isumalluarpunga
Tamatuma saniatigut ulloq unnuarlu paaqqinnittarfinni aqutsisut - aammalumi kommunalbestyrelsini Inatsisartunilu ilaasortat - persorsaasut sulinermi atugaasa pitsanngorsarneqarnissaat sukumiinerusumik ukkallugulu anguniarsinnaavaat.
- Aalajaaatsuutitsinissaq pingaarnerpaavoq. Meeqqat naapertuuttumik periuseqarluni ikiorneqarsinnaasariaqarput. Inuit meeqqanik isumaginninnermik suliallit amerlanerpaartaasa meeqqat atugaannik pitsanngorsaaneq anersaaqarfigaat.
- Misigigaangamilli suut tamarmik iluatsinngitsuuittut allamik suliffissarsiornissaat ilimanaateqarnerulertarpoq, Karen Margrethe Dahl oqarpoq.
Pilersaarusioqatigiilertut
Politikerit iliuuseqarnissaminnut piareersaleruttorput. Isumaginninnermut naalakkersuisoq Martha Abelsen (S) taama oqarpoq.
- Pilersaarusiornissatsinnut maanna uppernarsaateqalerpugut. Sulisut sulisoriinnarnissaat qanoq qulakkeerniassavarput? Maanna sulisooreersut piginnaasaannik qaffassaassaagut? Imaluunniit sulisut naammalernissaannut utaqqissaagut?
- Aamma kommunit pisariaqartitaannik qulaajaassaagut, Martha Abelsen KNR-imut oqarpoq.
Kisianni ulloq unnuarlu paaqqinnittarfiit perorsaasunik amerlanerusunik sulisoqalernissaannik sutigut sukumiisumik allannguisoqassanersoq, isumaginninnermut naalakkersuisup oqaatigerusunngilaa. Imaluunniit sutigut iliuuseqaqqaartoqartariaqarnersoq.
Martha Abelsenip oqarnera naapertorlugu nunatsinni kommunit suleqatiginerisigut ulloq unnuarlu paaqqinnittarfiit pillugit aasaq manna ukiarulu nutaamik pilersaarusiortoqassaaq.