Ullaassaq Nuummi innuttaasut kalerrisaammik kukkunermik itertinneqartut
Nuummi ullaassaq ajunaarnersuarmi kalerrisaarut nalunaaqutaq tallimanut tanneq arfineq pingasunngortoq appippoq. Tamanna teknikkikkut ajutoornermi aallaaveqartoq qatserisartunit misissorneqartoq, politiit facebookkimut allapput.
AAMMA ATUARUK Upalungaarsimanermut ataatsimiititaliap savimerngit sullullit nunamut kapputtakkat 50-it pisiarai
Ajunaarnersuarmi kalerrisaarut appikkaanga innuttaasut qanoriliortassanerannik politiit facebookiminnut ima ilisimatitsipput:
- Illup iluaniiginnarnissaq, paasissutissallu KNR-ip Sermitsiaq.ag-llu nittartagaatigut alakkarneqarsinnaasut, politiit allapput.
Paasissutissat isumannaqqaarlugit politiit paasissutisseerusuttut
Uanilu ajunaarnersuarmi kalerrisaarut appinneranut tunngatillugu politiit facebookkiminnut aatsaat nalunaaqutaq arfinernut qiteqquteriitsiartoq paasissutissiimmata paasissutissaq siulleq aatsaat saqqummerpoq.
AAMMA ATUARUK Pinngortitami ikuallannernut upalungaarsimaneq ataatsimoorullugu suliarineqartariaqarpoq
- Kalerrisaarutip aallartinneqarneranut sunarpiaq peqqutaanersoq qulakkeeqqaartinnagu innuttaasunut ilisimatitsissutigerusussimanngilarput ilumut kukkunerunersoq immaqaluunniit ajornartorsiornerunersoq, taamaammat kingusinaarluta paasissutissiivugut, Kalaallit nunaanni politiit pisortaata tullersortaa Sebastian Bech oqarpoq.
Siarngunnerit inuup inuuneranik naleqarsinnaasut
Taassuma oqarnera naapertorlugu kalerrisaarut appinneraniit innuttaasut politeeqarfimmut siarngussimapput.
- Paasisinnaalluarparput taamatut pisoqartillugu innuttaasut susoqarneranik paasissutissanik pissarserusuttussat. Kisianni taamaattoqartillugu politiinut qatserisartunulluunniit sianeqartussaanngillat. Politiinummi sianernerit inuunermik naleqarsinnaasut mattunneqarsinnaammata, Sebastian Bech oqarpoq.
Inuttut ulorianartorsioraanni piaarnerpaamillu atorfissaqartitsigaanni politiinut qatserisartunullu sianertoqarsinnaasoq politiit facebookkiminnut ilisimatitsipput.
Ajunaarnersuarmi kalerrisaarut upalungaarsimasunit misilinneqartoq uani takusinnaavat.