Borgmesteri: Pinngortitami ikuallannernut upalungaarsimaneq ataatsimoorullugu suliarineqartariaqarpoq

Nammineq kajumissutsiminnik sulisut qatserisartullu Sisimiuninngaanneersut Avannaaninngaaneersuullu Sisimiuni nunap ikuallarujussuarnerani ikiuutaasimapput, tamannali qamisaanissamut nammassimanngilaq. Taamaammat Danmarkimiit ikiorneqarnissamik Naalakkersuisut aalajangiisimapput.

Qallunaat qatserisartut 38-it atortut 13 tonsitut oqimaatsigisut nassarlugit marlunngormat aaggustip 13-iani Sisimiunut tikipput.  

- Nunatsinni nunarujussuit ikuallanneranni qatserinermi qamisaanermik ilisimasallit, qamisaanermilu atortut amigaatigaavut, Kommune Qeqertalimmi borgmesteri, Ane Hansen (IA) oqarpoq.

Pinngortitamik isumannaatsumik atuisinnaanissaq

Qatserisartut qulit Kangerluarsuk Tulliup qinnguani nunamik suli ikuallatumik qamisaajartortillugit Kommune Qeqertalik Avannaata Kommunialu ikiukkiartortitsisimapput.

Sisimiuni nunap ikuallannera nunarsuup silaannaata kissatsikkiartoneranik borgmesterip pissuteqartippaa. Taamaammat siunissami upalungaarsimanissaq pilersaarusiussallugu pisariaqartippaa.

- Kalaallimmi uagut kulturitsinnut atasumik pinngortitamik atuisorujussuuvugut isumannaatsumillu atuisinnaanissarput pillugu ataatsimoorluta upalungarsimanermut tungasunik pilersaarsusiornissarput pisariaqalerpoq, borgmesteri oqarpoq.

Sisimiuni nunap ikuallanneranut pujoorivik ikuallatsitsilersimasutut Qeqqata Kommuniata nalilerpaa.