Nunap ikuallannerata kingorna: Upalungaarsimanermut ataatsimiititaliap savimerngit sullullit nunamut kapputtakkat 50-it pisiarai
Sisimiut avannamut kangianni Kangerluarsuk Tullermi nunap ikuallannera qatserisartut qaammat ataaseq sinnilaarlugu qaminniarsarivaat. Aatsaalli Danmarkimi Upalungaarsimanermut Aqutsisoqarfimmit inuit 38-t atortunik 38 tonsinik nassarlutik ikiuukkiartortinneqarmata ikuallattoq qaminneqarpoq. Taamaammat Pinngortitamut Avatangiisinullu Naalakkersuisoqarfik maanna nunamut kapputtakkanik 50-inik Upalungaarsimanermut Aqutsisoqarfimmit pisivoq. Tassami nunamut kapputtakkat taakku nunap ikuallattup qaminniarneranut immikkut suliaritinneqarput. Savimerngit sullullit nunamut kaattaallugit kappunneqartarput, taamaalillunilu nunap iluani issoq imerterneqarsinnaalersarluni. Taamaaliornikkut nunami ikuallanneq siammaatsinnaveersaarneqarsinnaalersarpoq.
Aammattaq Pinngortitamut Avatangiisinullu Naalakkersuisoqarfiup pilersaarutigaa nunami ikuallattoqartarnera pillugu isumasioqatigiissitsinissaq kommunini upalungaarsimasut suleqatigalugit. Ilimagineqarpoq Upalungaarsimanermut Aqutsisoqarfimmit immikkut ilisimasallit isumasioqatigiinnermut peqataassasut.
Tamatuma saniatigut Pinngortitamut Avatangiisinullu Naalakkersuisoqarfiup misissorniarpaa, nuna tamakkerlugu nutaanik suliniuteqartoqarnissaa imaluunniit nunami ikuallattoqarnissaa pinaveersaarniarlugu nutaanik malittarisassiortoqarnissaa pisariaqartinneqarnersoq.
Ikuallattoq maanna qaminneqarsimalerpoq, sumiiffimmilu qatserisartunut unamminarsimaqisoq Anguteeraq Davidsen KNR-imut oqaluttuarpoq.
- Ikuallattoq anorimit ammut supoorneqartuarpoq, innerlu annertoqisumik naarallartarluni, Anguteeraq Davidsen oqarpoq.
Ikuallanneq pilertoqisumik annertusiartorpoq, qaqqakkullu ammut ikuallannernit allanit sukkanerusumik siaruaalluni, oqaluttuarpoq.
Qaqqat marluk kaajallallugit ikuallattoqarpoq.
- Ikuallattoq qatserniaraluarparput putsumik kaajallaqqalluta. Illuaqqat annaanniarlugit ilungersoqaagut.
Qatserisartut misigisaat pillugit videoliaq ataani takuuk.
