Uldum: Borgmesterit isornartorsiutaat kukkuneqarpoq

- Taanna tunngaviusumik kukkuneruvoq, aningaasaqarnermut aatsitassanullu naalakkersuisoq, Anda Uldum borgmesterit isornartorsiutaat pillugu taama oqarpoq.

Borgmesterit Hermann Berthelsen, Ole Dorph aamma Jørgen Wæver Johansen, Namminersorlutik Oqartussanit Nuuk salliunneqartarnerarlugu pingasunngormat ataatsimoorussamik tusagassiutinut nalunaarumminni allapput.

Tamanna pillugu Qeqqata Kommuniani borgmesteri, Hermann Berthelsen ima oqarpoq:

- Assersuutigiinnarlugu Namminersorlutik Oqartussat suliffeqarfiutaasa ilaat, maani Nuummi angerlarsimaffillit imaaliallaannaq aningaasarpassuarnik attartornissaminnut akuerineqartarput.

- Inuiaqatigiit tamatta tassani qularnaveeqquusiisuusarluta. Taamaammat tassuuna assigiinngissuteqartutut isumaqarfigivarput, Hermann Berthelsen borgmesterit pingasut isornartorsiutaat pillugu taama oqarpoq.

Aamma atuaruk Tele-Postip nunarput tamakkerlugu sullippaa - Nuuinnaanngitsoq

Taakku isornartorsiuinerminni Nuummi inissiaatileqatigiiffik, Illuut A/S assersuutitut taavaat.

- Illuut A/S milliardit tungaanut massakkut akiitsoqalerpoq. Nuummiinnarlu allaffinnik inissianillu sanaartortuulluni. Taamaammat taannartaa aamma isumaqarpugut pissusissamisuunngitsoq, Hermann Berthelsen oqarpoq.

Immap naqqatigut kabelissaq avannaanut tallinissaata kingusinaarnera, Nuummilu umiarsualivittaassaq borgmesterit aamma isornartorsiorpaat.

Borgmesterilli oqariartuutaasa pingaarnersaat tassaavoq aktiaselskabit aningaasanik atorniarunik qularnaveeqquteqaqqaartussammata. Qulaarnaveeqqutissat taakku Nuummi aktiaselskabinut neqeroorutigineqartarput, borgmesterilli kommunianianiunngitsoq. Taamaasillutillu aningaasanik atorsinnaanatik.

Isornartorsiutilli taassuma paasissutissartai piviusuunnginnerarneqarput

- Tupaallappunga aallaqqaammut uani suliffeqarfinnut garantinut tunngassutilik. Eqqaamasakka malillugit kingullermik taamaaliortoqarpoq Puisi a/s-i piumallermat.

- Taamaammat taamaattunik ingerlatsineq ajorpugut massakkut, aningaasaqarnermut aatsitassanullu naalakkersuisoq, Anda Uldum taama oqarpoq. Illuut a/s pillugu piginneqatigiiffiit sorliit amigartooruteqarlutik ingerlasinnaanerat Naalakkersuisut aalajangersinnaanngikkaat ilanngullugu aamma oqaatigaa.

- Eqqaamassavarput realkreditforeninngi illoqarfinni anginerni sisamani aningaasaleeqataasarput. Tassa Nuummi, Ilulissani Sisimiunilu. Qaqortoq uteriaallannikuuvoq, kisianni illoqarfinni taakkunani sisamani procenti annertungaatsiartorsuaq, immaqa 80 procenti tungaanut nuummi realkreditsit aningaasaleeqataasarput.

- Realkreditsit taakku nammineq kiffaanngissuseqarput, qanoq iliussanerlutik. Uagut taanna susinnaanngiivipparput, aningaasaqarnermut aatsitassanullu naalakkersuisoq Anda Uldum oqarpoq.

Immap naqqatigut kabelissaq Telep akisussaaffigigaa, Nuummilu umiarsualivissaq Nunatsinnut tamarmut iluaqutissaasoq, naalakkersuisup aamma oqaatigaa.