Ukrainimiunik qimarngusunik nunatsinnukartitsissaagut? Soorunami, Augusta oqarpoq
Ruslandip Ukrainemut saassunnerata sapaatip akunnerata ataatsip matuma siorna aallartinneranit inuit millioningajaat Ukrainemit qimaareerput.
Nunarpulli qimaasut ilaannik tikilluaqqusissava?
KNR-imiit Nuummi illoqarfiup qeqqani aqqusinermi naapitatta tamanna assigiinngitsunik ippassaq isummerfigaat.
Nunatsinni angerlarsimaffeqanngitsut iliuuseqarfigeqqaartariaqarput, qimaasut nunatsinnukassappata illoqarfinnut inissaaleqiffiunngitsunukartinneqarsinnaapput aammalu akulerutinngikkutta pitsaanerusoq aqqusinermi naapitagut ilaatigut taama isumaqarput.
- Uagut maani Nuummi aamma inissaaleqisorparpassuugatta, Frederik Høegh-Olsen taama oqarpoq.
Taanna angerlarsimaffeqanngitsuuvoq:
- Soorlu uanga imminut assersuutigissaguma: Ullut tamaasa suliniarsarivunga angerlarsimaffeqarnangalu. Kammalaatinni siornatigullu opgangini unnuisarlunga, tamakkulu atukataqaakka, Frederik Høegh-Olsen oqarpoq.
Ukrainimiit qiimaasunik nunatsinnut tikilluaqqusissanersugut politikikkut eqqartoqqaarneqartariaqartoq naalakkersuisut siulittasuata Múte B. Egedep siusinnerusukkut oqaatigaa.
Nunatsinnili angerlarsimaffeqanngitsut siulliunneqartariaqartut Frederik Høegh-Olsen isumaqarpoq.
- Uagut siulliunneqarnissarput taanna pingaaruteqarnerujussuuvoq.
Ukrainimiut 100-init 200-inut amerlassuseqartut nunatsinnukarsinnaasut
Nunarpummi qanoq ikiuussinnaava?
- Ukiuni makkunarnerpiaavik ajornakusoortutut isinnarpoq, nunatsinni ajornartorsiortut amerlaqigamik. Tamatta ajunngitsumik inissisimasuugutta tikilluaqqunaraluaqaat.
Sorsunnermut akulerutinngikkutta pitsaanerusoq 17-inik ukiulik Najaaja Rosing isumaqarpoq.
- Nunarput akuunngippat taanna pitsaanerussasoq isumaqarpunga. Maanga tikeralerarluarpata sorsunneq uagutsinnut tussinnaagami. Uagutsinnut aamma kingunerluuteqarluni, Najaaja Rosing taama oqarpoq.
Lars Jørgen Kleistili akerlerluinnaanik isumaqarpoq.
- Periarfissaqarpat uanga tikilluaqquserusuppunga. Immaqa inuit 100-200-ut tungaanoorsinnaagaluarput, pissutigalugu nalunngilarput massaakut inuiaqatigiit taakkua taamannak 100.000-it qimarrapput, taamaattumik pisariaqartitsipput. Periarfissaqarpat, inissaqatikkutsigit uanga akuerisinnaavara, Jens-Jørgen Kleist taama oqarpoq.
Qimaasut illoqarfinnut inissaaleqiffiunngitsunut soorlu Uummannamut, Upernavimmut Qaanaamulluunniit tikisinneqarsinnaagaluartut taanna isumaqarpoq.
Inuit qimaasunut namminneq angerlarsimaffimminnut aamma tikilluaqqusisinnaasut Atassutip siulittaasuata, Aqqalu Jerimiassenip ippassaq siunnersuutigaa.
Tamanna aamma siunnersuutitsisalaasoq, Lars Jørgen Kleist oqarpoq:
- Periarfissaq taanna aamma isumallatsialaavoq, kisianni soorunami oqaloqatigiissinnaaneq imminnullu paaseqatigiissinnaaneq pingaaruteqartorujussuussaaq, kisianni uanga immaqa piukkunneruvara najugaqarfiit arlaatigut inissaqartut, illut atorneqanngitsut assigisaallu ataatsimoortillugit, imminnut ataatsimoornissaat, ilaqutariit ataatsimoornissaat pisariaqarpoq, Lars Jørgen Kleist taama oqarpoq.
Qimaasunut tikilluaqqusinissaq isumatsialaasoq Augusta Josefsen isumaqarpoq. Taassuma ukrainimiut meerartaat eqqarsaatigai.
- Meeqqat sorsunnermik nalaataqartut naakkinarput. Soorunami arlaatigut ikiuukkusunnarpoq.
Angerlarsimaffinnut tikilluaqqusisinnaanissat takorloorsinnaaviuk?
- Soorunami. Meeqqat pillugit ikiuukkusuppunga, tikilluaqqullugillu, Augusta Josefsen oqarpoq.
