Ukraine pisortatigoortumik Ruslandimut sorsulerpoq

Sakkutuut immikkut sungiusakkat marluk Ruslandiminngaanneersut Ukrainemi sapaatip-akunnerata naanerani tigusarineqarsimanerat, taassuma innersuussutigai. Ukrainep kangisissuani pikitsitsisut Ruslandimik pingaartitsisut Ruslandimit aqunneqarnerannut tamanna takussutissaasoq, Ukrainemilu avissaartuuttoqarnissaa aamma siunertaasoq Porosjenkop oqatigaa.

Angutit marluk Ukrainemi tigusarineqartut taakku sakkutuunut immikkut sungiusakkanut Ruslandimeersuusunut peqataanertik killisiorneqarnerminni nassuerutiginikuuaat, qaammatit marluk matuma siornatigut Ukraineliartinneqarnikuunertik nassuerutigalugu.

Ukrainep kangisissuani sakkuaattoqarnerani inuit 6250-it maannamut toqutaasimasut, inuillu 1 millionit sinnerlugit angerlarsimaffimminnit qimaasariaqarsimasut, Naalagaaffiit Peqatigiit eqqoriarpaat.

Ukrainep sakkutuui arfineq-pingasut sakkuaannerni ataasinngormalli toqutaasimapput, Russillu toqutsisuusut Ukrainemiut oqaatigaat.