Ukiut arfinillit peqataanngereerlutik: Sisoraaserlutik oqilaniuttartut Arctic Winter Gameseqataasussat toqqarneqarput

Ukiuni arfinilinngortuni siullerpaamik sisoraaserluni oqilaniunnermi Nunarput Arctic Winter Gamesimi peqataatitaqassaaq.

Sisorartartut kattuffiata ataani sisoraaserluni oqilaniunnermut ataatsimiititaliaq ukiut arlallit suliniuteqarpoq sisoraaserluni oqilaniunnermi nutaanik inerisaalluni tamannalu meeqqanik inuusuttuaqqanillu sungiusaasunik pikkorissaanikkut ingerlavoq.

Ineriartorneq ilorraap tungaanut aallareersoq sisoraaserluni oqilaniuttarneq pisoqarfiulluaqqilerpoq maannalu sisoqqarissut arlallit Arctic Winter Gamesimut piareerput.

- Toqqaaniarneq ajornannginaarparput. Takusinnaareerparput kikkut sungiusarnerminnik pimoorussusut pikkorissuusullu, niviarsiaqqanik Arctic Winter Gameseriartunik nakkutilliisussaq Nivi Geisler oqarpoq.

Nukappiaqqat nakkutilliisorissavaat Angutivara Tønnesen Aasianneersoq. Taakku katillugit sisorartartut arfinillit angalaqatigalugit aappaagu issittormiut unammiuaarnerannut Alaskami pisussamut peqataajartussapput.

Inuttut ineriartorneq

Arctic Winter Games 2020-mi 2022-milu uninngasariaqarnikuuvoq ukiorlu unammiuaartitsisarneq aallarteqqippat Nunatsinniit sisoraaserluni oqilaniuteqataasoqanngilaq. Maanna sisorartartut arfinillit takutinniartussanngorpaat sungiusarnerminni issittormioqatitsinnut sanilliullutik sumut killinnerlutik.

- Sisorartartuvut qanoq angusaqarumaarnersut pissanganartorujussuuvoq. Pissanganitsinnut pissutaaqataavoq nalunnginnatsigu sisorartartuutitta killiffiat qaffasissoq Nunatsinni sisorartartoqataannut sanilliullugu, Nivi Geisler oqarpoq.

Sungiusarneq aallarteqqereerpoq arpannikkut, assakaasulinnik sisorarnikkut nukkassarnikkullu.

- Inuusuttuaqqat januarimi Aasianni sungiusaqatigiisinneqassapput illoqarfinnit arlalinnit peqataaffigineqartumik. Aamma martsip aallartilaarnerani Maniitsumi skifestivaleqartussaavoq. Taamaattumik Arctic Winter Games sioqqullugu sungiusaqatigiinnissamut periarfissat arlaqarput, Nivi Geisler oqarpoq.

Taassuma aamma qularinngilaa Arctic Winter Gamesimi unammiffimmi pissarsiat saniatigut unammisartut pissarsiumaartut.

- Qularinngilara peqataanertik inuttut ineriartuutigiumaaraat, Nivi Geisler oqarpoq.