Politiit ullormut nalunaarusiaat: Ukiukitsut tallimat biilinik aallarussisut
Nuummi politiit biilit Nuup ilaani Nuussuarmi ullaassaq nalunaaqutaq sisamanut qiteqqunnerata missaani unitsippaat. Ukiukitsup biilit ingerlakkai tassani paasinarsivoq.
Nukappiaqqat tallimat, 14-it 15-illu missaanni ukiullit biilinut ilaapput. Taakkunannga marluk inunnik isumaginnittoqarfimmut tunniunneqarput, angajoqqaavinullu kingorna apuunneqarlutik. Nukappiaqqat sinneri pingasut kinaassusaat ilisimaneqarpoq, taakkuali politiinit suli oqaloqatigineqaratik:
- Nukappiaqqat pingasut kinaassusaat politiit ilisimavaat. Nukappiaqqat politiinit oqaloqatigineqareerpata inunnik isumaginnittoqarfimmut tunniunneqassapput, angajoqqaavinullu kingorna aamma apuunneqassallutik, Preben Kleist, Kalaallit Nunaanni Politiit pigaartuisa pisortaat KNR-imut oqarpoq.
Sineriak tamakkerlugu ataatsimut isigalugu inuit ullup unnuallu kingulliup ingerlanerani eqqissisimasimasut politiit nalunaarutigaat.
- Sinerissap ilaani angerlarsimaffinni ataasiakkaani eqqissiviilliortoqarpoq, pinartumilli pisoqanngilaq, pigaartut pisortaat Preben Kleist oqarpoq.