Politiit ullormut nalunaarutaat: Ukiukitsoq savimmik kapisisimasutut pasineqartoq
Ulloq unnuarlu kingulleq Kalaallit Nunaanni Politiinut ulapaarfiusimasoq, pigaartut pisortaat Malik Olesen marlunngornermi ullaakkut oqarpoq.
Ullormut nalunaarusiami pisimasorpassuaqarsimanerarpaa. Ilaatigut Nuummi nukappiaraq 15-it inorlugit ukiulik ataasinngornermi unnukkut aqqarnup missaani angummik 40-nik ukiulimmik savimmik kapisisimasutut pasineqarpoq.
- Nukappiaraq pasineqarpoq, kisianni suna pissutaasimanersoq imaluunniit 40-nik ukiulimmut qanoq attuumassuteqarnersoq oqaatigisinnaanngilara, Malik Olesen oqarpoq.
Nakuusernerli pillugu suliaq maanna aallartinneqartoq, aamma nukappiaqqap ukiukitsuunera pissutigalugu isumaginninnermut oqartussaasut pisoq pillugu ilisimatinneqarsimasut, taanna oqaluttuarpoq.
- 40-nik ukiulik pisup kingorna Dronning Ingridip Napparsimmavissuanukaanneqarpoq, qujanartumillu inuunera navianartorsiunngilaq, pigaartut pisortaat oqarpoq.
Nukappiaqqap nakuuserfiginninnerata saniatigut aamma angummut allamut 40-t missaannik ukiulimmut siorasaarisimaneranut suliaq ingerlavoq.
Upernavimmi ujaasineq suli ingerlanneqartoq
Politiit avannaani 22-nik ukiulik Anton Lynge, arfininngornermi unnukkut nalunaaqutaq 02.47 periarfeerunneqartoq, suli ujaaraat.
Angut kingullermik takuneqarami nikallungallunilu imigassartorsimalluni ingerlasimasoq politiit ataasinngornermi ullaakkut ilisimatitsipput. Politiit, kajumissutsiminnik ikiuuttut, ilaqutaasut qatserisartullu arfininngornermili angut ujaarisimavaat, sulili iluatsitsisimanngitsut pigaartut pisortaat marlunngornermi ullaakkut oqarpoq.
Kalaallit Nunaanni Politiit Facebookikkut ujaasinertik nalunaarutigisimavaat, sumiissinnaaneranillu inuit alapernaannissaannik kaammattorlugit.
Tamatuma saniatigut ulloq unnuarlu kingulleq imigassamut aalakoornartulimmut attuumassutillit, aqqusinermi eqqissiviilliornerit angerlarsimaffinnilu eqqissiviilliornerit pissutigalugit ulapinnarsimasoq, Malik Olesen oqaluttuarpoq.
- Pisimasut amerlanersaat Nuummi nalunaarsorneqarput, sinerissamili aamma imigassaq pissutigalugu sulianik ingerlasoqarpoq.
Sisimiuni aallarussisoqartoq
Kiisalu unnuaq Sisimiuni ATV-mik aallarussisoqarsimasoq, politiit pigaartuata eqqaavaa.
- Inuusuttut aallarussisuusimassangatinneqarput, suliarli suli ingerlavoq, Malik Olesen oqarpoq.
