Kangersunermi erngup nukiliorfissaq 2031-mi piariissangatinneqartoq
Kangersuneq Qasigiannguanit 20 kilometerinik kujasik kangisitsigisumiippoq. Tassani erngup nukinganik innaallagissiorfeqalissasoq Inatsisartunut 2021-imi ilaasortat aalajangerput. Taanna piareeruni Qasigiannguanut Aasiannullu innaallagiamik pilersuilissaaq. Taamaalilluni Kalaallit Nunaanni innaallagiamik nukissiornermi uulia atorneqartoq tallimararterummik annikillissaaq.
Nukissiuuteqarnermut naalakkersuisoq, Naaja H. Nathanielsen, sanaartornissaq pillugu KNR-imut allakkatigut ima ilisimatitsivoq:
- Sanaartorneq ukiut sisamat missaannik sivisussuseqassasoq ilimagineqarpoq. Erngup nukinganik innaallagissiorfik 2031-imi naammassereersimalluni atulereersimassaaq.
Taamaalilluni sanaartorneq kingusinnerpaamik 2028-imi aallartissaaq.
Akisunerulerataannaanera pillugu oqaatigiumanngikkaa
Namminersorlutik Oqartussat ingerlatseqatigiiffiutaat, NunaGreen, sanaartortitsisuussaaq.
Taannali suli suliariumannittussarsiuussinngilaq. Taamaammallu aningaasat sinaakkutaasut maanna saqqummiukkumaneqanngillat.
- Aningaasartuutissatut missingersuutinik tamanut saqqummiussineq unammilleqatigiinnermut sunniisinnaavoq, taamaalilluni suliniummik inuiaqatigiinnut akisunerulersitsilluni. Paasissutissat erseqqinnerusut suliariumannittussarsiuussinissaq naammassineqarpat ingerlateqqinneqarsinnaapput, Naalakkersuisoq allappoq.
Suliassamik suliariumannittussarsiuussinissaq 2026-imi pissasoq naatsorsuutaavoq.
Sanaartornerup aningaasalersorneqarnissaa taarsigassarsinikkut ilaatigut pissaaq. Inatsisartut pineqartup sanaartornissaanut aamma Utoqqarmiut Kangerluarsunnguani, Nuup kujataatungaaniittumi, innaallagissiorfiup allilernissaanut 400 millionit koruuninik 2023-imi aningaasaliipput.
Kangersunermi sulisoqassanngitsoq
Sanaartornermi sulisut qanoq amerlatigissanersut suliariumannittussarsiuussinermi ajugaalluni sanaartorumaartussap nammineq aalajangissavaa. NunaGreenilli paasissutissiinera naapertorlugu ulapaarnerpaaffimmi sulisut 120-it missaanniinnissaat naatsorsuutaavoq.
Nukissiorfiit innaallagissiorfik piareerluni atulerpat ingerlatsinermut akisussaasunngussapput. Taakkua paasissutissiinerat naapertorlugu innaallagissiorfissaq ungasianit, tassa Qasigiannguanit Aasianniillu aqunneqarsinnaasuussaaq. Taamaalilluni Kangersunermi sulisoqarnissaa naatsorsuutaanngilaq.
Sanaartornissap avatangiisinut sunniutissai pillugit maanna juulip pingajua ilanngullugu tusarniaasoqarpoq.
