Assammik arsarluni pissartanngorniunneq: Ukiorpassuarni pissartat pissartanngoqqittut aamma tupaallatsitsillutik bronzennattut
Nunarput tamakkerlugu assammik arsarnermi Nuummi Inussivimmi ippassaq pissartanngorniuttoqarmat isiginnaariat illersuisut ikinngeqaat.
Angutinimi arnanilu Bronzennanniuttoqarlunilu kuultinnanniuttoqarpoq.
Unamminermili kingullermi, tassa angutit GSS aamm NÛK pissartanngorniummata isiginnaartut pikkusunnerpaallutik isiginnaarsimasut, KNR-ip timersornermi ataqatigiissaarisuat, Noah Mølgaard oqaluttuarpoq.
GSS kuultinnaqqittut
GSS angutitaat ukiut qulit sinnerlugit kuultinnattarsimasut, unamminerup ingerlanerani pissanganarsilluinnalersimagaluartut, timersornermi ataqatigiissaarisoq oqaluttuarpoq.
- Pissanngatigineqarnikuugaluarpoq ukioq manna angutit pissartanngorniunneranni NÛK, GSS-ip angutitaanut ajugaasinnaassanersoq. Aamma unammineq pissanganarsiartuleruttortut NÛK -p arsartuini pingaarutilerujussuaq Angutimmarik Kreutzmann seeqquminik annerami. Taamaasilluni NÛK isertitseriarniartarnera unikaallalluni, taanna assigiinngissutaaqataavoq, Noah Mølgaard oqarpoq nangillunilu:
- Kisianni aamma GSS arsartugissaartorujussuuvoq. Ukiut arlalissuit iligiillutik imminnut ilisarisimalluartut taakkulu saniatigut aamma målmandigissaartorujussuullutik taamaasillutik taanna suleqatigiilluarneq sakkugalugu GSS-ip arsatui pissartanngoqqipput.
GSS-ip arnartai aamma NÛK-mut ajugaapput.
- GSS-ip arnartai eqqarsaatigalugit tassa GSS-ip arnani pissartanngortitaani qulit nunanut allanut uammisartunut toqqakkanut ilaapput, qaammat tulleq VM-imut anngunniuteqataasussat. Arsartut taama amerlatigisut iligiinni nunanut allanut unammisartuuppata taava ilimagereertariaqarpoq aamma iligiinnit allaninngaanniit pitsaanerungaatsiarnissaq.
Qaqortormiut bronzennattut
K-33 Akuleriillu brozennanniunneranni Qaqortumeersut K-33 tupaallatsitsillutik ajugaapput, taakku ukiorpassuarnik medajlamik angerlaassisimanatik maanna angerlaassisussanngorput.
- Oqaluttuarisaaneq eqqarsaatigalugu alutorsaatissaavoq K-33 arnartai ukiuni 20-ni kingullerni ujaminnannikuunatik ippassaq ujaminnammata bronzennanniunnermi ajugaallutik, taamaalillutik ujammit K-33 arnartaasa pisariaqarteqisaat maanna tassa Qaqortumut angerlaanneqartussanngorput.
Inussivik ippassaq inoqangaatsiarpoq, taakaniittuulluni suna maluginiagassaava?
- Qaqutigoorpoq Inussivik taama inoqartigaluni taama nippassimaarfiutigisarnera. Ippassaq ualeq inuppassuit immaqa 1000-it missaannik isersimallutik illersukkaminni illersuilutik nillianerat nuannisarnerat assut isersimaqataalluni pikkunaqutaasorujussuuvoq, Noah Mølgaard oqarpoq.
Arnat assammik arsarlutik VM-imut juunip sisamaani Nuummi anngunniuttussaapput. Anngunniunnerit KNR-TV-kkut aallakaatinneqarsinnaanavianngillat, Youtubekkulli isiginnaarneqarsinnaajumaarput.
Tassa nunatsinni arnat assammik arsartartut nunanut allanut unammisartui VM-imut nunagisami anngunniuterngaartussanngorput.
