Ukiornissaanut peqqumaatissat utaqqisaajuartut Ittoqqortoormiinut kiisami tikiunneqartut
Ukiuunerani peqqumaatissat Ittoqqortoormiinut maanna apuussimalerput.
Umiarsuuarmi containerinik usisartoq Malik Arctica Ittoqqortoormiinut apuussimavoq Ittoqqortoormiillu avataanni maanna kisaqqalluni.
Ukiuunerani peqqumaatissat prammit atorlugit usingiarneqaleruttortut, Royal Arctic Linep nittartakkamini allaaseraa.
Umiarsuaq peqqumaatissanik useqartoq illoqarfiup avataani sikorsuit pissutigalugit oktobarip ulluisa arfineq-aappaannni nikinneq ajuleqqasoq RAL-ip nalunaarutigaa.
AAMMA ATUARUK Malik Arctica Ittoqqortoormiinukaqqaarani Reykjavikkiliartoq
- Umiarsuup illoqarfimmut tikissinnaannginneranut arlalinnik puttaarsuaqarneranik pissuteqarpoq, 2-3,4 km-inik takissuseqarput meterinillu marlunnik annertunerusumilluunniit issutigalutik, Royal Arctic Line taamanikkut allappoq.
Umiarsuaq orsersoriartorluni, peqqumaatissanillu nutaanik aallerluni kingorna taava Reykjavikiliartariaqalerpoq. Umiarsuarlu Ittoqqortoormiinut maanna tikissinnaalersimavoq.
Umiarsuup usinginiarneqarnera arfininngorpat oktobarip ulluisa 23-anni naammassineqarsinnaanissaa naatsorsuutigineqarpoq. Malik Arctica kingorna taava Nerlerit Inaannut ingerlaqqissaaq ullorlu taanna tikissangatinneqarluni.
