Ukaleq Slettemark Norgemi angusarissaarpoq

Kalaaleq sisoraaserluni ooqattaasartartoq Ukaleq Slettemark, inuusuttuaqqat nunarsuarmi sapaatip-akunnerata siuliani pissartanngorniunneranni normu 4-tut inissittoq, Norgemi pissartanngorniunnermi unammisuni K17-imi ippassaq tallimanngornermi peqataagami normu 2-nngorpoq.

AAMMA ATUARUK Ukaleq Slettemark VM-imi normu 4-ngorami qiasimavoq

Sisoraaserlutik ooqattaasartartut ingerlaarfiat 10 kilometerinik isorartussuseqarpoq, ingerlaarnerminnilu sisamariarlutik ooqattaasarnerminni katillugit 20-riarlutik igittussaallutik.
Uniuineq ataaseq 45 sekundinik "akeqarpoq", oqilaniunnermilu angusamut taanna ilaneqartarluni.

Maren Bakken, NTG Lillehammerimeersoq, oqilaniunnermi ajugaavoq, naallu ingerlaarfiusumi Ukaleq Slettemarkimit 21 sekundinik kigaannerugaluarluni, ooqattaasarnermi ikinnernik uniuivoq, katillugillu 24 sekundinik sukkanerulluni ajugaalluni.

Ukaleq Slettemarkip angusani tulluusimaarutigaa, peqataasummi 50-it akornanni ingerlaarfimmi sukkanerpaavoq.

AAMMA ATUARUK Ukaleq Slettemark Italiami angusarissaartoq